२९ जेठ २०८३, शुक्रबार
भारतको उत्तर प्रदेशस्थित प्रयागराजबाट सय वर्ष पुरानो अष्टधातुको मूर्ति चोरी भएको थियो । चोरी भएको मूर्ति १० दिनपछि भेटिएको छ । तर, चोर भने पत्ता लागेको छैन । प्रहरीले चोरको खोजी गरिरहेको छ ।
मूर्ति आफैं भेटिएको भने होइन । चोर आफैंले १० दिनपछि राजमार्ग नजिकै राखेर गएका हुन् । सँगै उनले माफी पत्र पनि लेखेका छन् ।
इन्डिया टुडेको रिपोर्टअनुसार घटना गंगापार क्षेत्रको नवबगञ्ज राम जानकी मन्दिरको हो । सेप्टेम्बर २३ मा मूर्ति चोरी भएको थियो ।
यसबारे प्रहरीलाई जानकारी गराइएको थियो । चोरी भएको १० दिनपछि राजमार्गको सर्भिस रोडबाट गौघाट लिंक रोडमा मूर्ति भेटिएको थियो । यसबारे मन्दिरका पुजारी जय रामदास महाराजलाई जानकारी गराइएको थियो । त्यसपछि मूर्तिलाई गौघाट खालसा आश्रममा ल्याइएको छ ।
आश्रमका मानिसहरूले मूर्ति भएको झोलामा एउटा चिठ्ठी पनि राखिएको देखे । पत्र मूर्ति चोर्ने चोरले लेखेका थिए । उनले चोरीको लागि पछुताउँदै मन्दिरका पुजारीसँग माफी मागेका छन् ।
चोरले चिठीमा लेखेका छन्, 'महाराज जी, नमस्कार। मैले ठूलो गल्ती गरेको थिएँ । अज्ञानताले गौघाटबाट राधाकृष्णको मूर्ति चोरेको थिएँ । चोरी भएदेखि नै मलाई दुःस्वप्न लागिरहेको छ । र मेरो छोराको स्वास्थ्य पनि बिग्रिएको छ। थोरै पैसाको लागि मैले धेरै फोहोर काम गरेको छु। मैले मूर्ति बेच्न धेरै छेडछाड गरेको छु। आफ्नो गल्तीको लागि माफी माग्दै मूर्ति छोड्दै छु। मलाई माफगरी भगवानलाई मन्दिरमा पुनर्स्थापना गराइदिन अनुरोध गर्दछु । महाराज जी, हाम्रा बच्चाहरूलाई क्षमा गर्नुहोस् र तपाईंको मूर्ति स्वीकार गर्नुहोस् ।'
मन्दिरमा मूर्ति स्थापना गरी पूजा पनि शुरू भएको छ । नवाबगञ्ज पुलिस स्टेशनले नजिकैको सीसीटीभी क्यामेराको फुटेज जाँच गरिरहेको छ । प्रहरीले चोरको खोजी गरिरहेको छ ।
