१३ साउन २०८३, बुधबार
एभरेष्ट महिला भलिबल लीगको उपाधि हासिल गरेपछि महिला भलिबलकी नवोदित खेलाडी सुमित्रा रेग्मी चर्चाको शिखरमा छिन् ।
गत शनिबार सम्पन्न लीगमा रेग्मीले नेतृत्व गरेको ‘कर्णाली यश्विज’ले उपाधि जित्यो ।
एसियामै पहिलोपटक भएको महिला भलिबल लीगले नेपालका महिला खेलाडीको ब्रान्डिङ पनि गरेको छ ।
‘कर्णाली यश्विज’बाट लीग खेल्न आएकी अमेरिकन खेलाडी ग्याब्रिएल बेन्डा (सेटर)को नजरमा परिन्, सुमित्रा ।
अग्लो कद र क्विक स्पाइकका कारण रेग्मीप्रति उनको नजर परेको हो ।
न्यू डायमन्ड स्पोर्ट एकेडमीका मुख्य प्रशिक्षक कुमार राईले सुमित्राको खेलको प्रशंसा गर्दै अमेरिकी खेलाडी बेन्डाले विश्वका अन्य लीगमा रिफर गर्ने बताएको लोकान्तरलाई जानकारी दिए ।
‘बेन्डाले मलाई सुमित्राको खेल एकदमै मन पर्यो, उनको भविष्य उज्ज्वल छ । म उसको सेटर भएर खेल्न चाहन्छु । नेपालको मात्र नभएर कुनै ठाउँको खेल्दा उनलाई रिफर गर्छु भनेर कुरा गरेकी छिन्,’ राईले लोकान्तरसँग भने, ‘सोमबार हामी यही कुरा गरेर छुटेका छौं । हाम्रा लागि धेरै खुसीको कुरा हो ।’
संखुवासभाको चैनपुर नगरपालिका– ९ त्रिशुलेमा जन्मिएकी सुमित्राले गत साउन तेस्रो साता नेपालमा भएको काभा वुमन्स भलिबलबाट राष्ट्रिय टीममा डेब्यु गरेकी हुन् ।
उनले न्यु डायमन्ड एकेडमीको तर्फबाट खेल्दै आएकी छिन् ।
हेर्नुहोस्, सुमित्राको भलिबल यात्राबारे प्रशिक्षक राई र खेलाडीसँग गरिएको भिडियो कुराकानी :
