०२ असार २०८३, मंगलबार
मादक पदार्थ सेवन (मापसे) जाँचमा ट्राफिक प्रहरीले कडाइ गरेपछि पछिल्लो समयमा चालकले लागू पदार्थ सेवन (लापसे) गरेर सवारी हाँक्न थालेको पाइएको छ ।
चेकजाँचका क्रममा यात्रुबाहक तथा मालबाहक सवारी चलाउने चालकले समेत लापसे सेवन गरेको पाइएको प्रदेश प्रहरी राजमार्ग सुरक्षा तथा ट्राफिक व्यवस्थापन कार्यालय रामनगर चितवनका प्रमुख एसपी नरेशराज सुवेदीले जानकारी दिए ।
‘दुर्घटना न्यूनीकरणका लागि ट्राफिक प्रहरीले लापसे चेकिङलाई तीव्रता दिएको छ । यही पुस १ देखि २५ गतेसम्म मात्रै बागमतीका १० जिल्लाका ४९ चालक लापसे कारबाहीमा परेका छन्,’ सुवेदीले लोकान्तरसँग भने, ‘मापसे कारबाहीबाट जोगिन चालकले लापसे गर्न थालेको पाइएको छ ।’
उनका अनुसार क्षमताभन्दा बढी यात्रु बोक्ने, तीव्र गतिमा सवारी चलाउने, विना हेलमेट र तीनजना सवार भएर मोटरसाइकल/स्कूटर चलाउने प्रवृत्ति पनि बढेको छ । यो प्रवृत्तिलाई निरुत्साहित गर्न राजमार्ग तथा अन्य सहायक मार्गमा सवारी जाँचमा कडाइ गरिएको छ ।
लापसे गरेका चालकलाई ठाउँको ठाउँ जाँच गरेर कारबाही गर्दै आएको जानकारी सुवेदीले दिए ।
उनका अनुसार यो महिनाको २५ गतेसम्म गरिएको लापसे चेकिङअन्तर्गत सबैभन्दा धेरै सिन्धुली रुटमा चल्ने सवारीका चालक कारबाहीमा परेका छन् ।
सिन्धुली रुटमा चल्ने लामो दुरीका सवारीसाधनका २५ चालक कारबाहीमा परेका हुन् । सिन्धुलीपछि चितवनमै लामो दुरीका चालकहरू लापसे गरेर सवारी हाँक्दै गरेको अवस्थामा भेटिएका छन् । चितवनमा ६ चालकलाई लापसे सेवनमा कारबाही गरिएको छ ।
त्यस्तै, मकवानपुर, काभ्रे, सिन्धुपाल्चोक, रामेछाप, दोलखा र धादिङमा पनि केही सवारी चालक लापसे गरेर सवारी हाँकेको पाइएपछि कारबाहीमा परेका छन् । झण्डै एक महिना लामो चेकजाँचमा नुवाकोट र रसुवामा भने लापसे गरेका सवारी चालक भेटिएका छैनन् ।
लागुपदार्थ सेवन गरे/नगरेको पत्ता लगाउन ठाउँको ठाउँ पिसाब जाँच गर्ने गरिएको छ ।
एसपी सुवेदीले भने, ‘चालकको युरिन चेक गरेर लापसे गरे/नगरेको तत्कालै पत्ता लाग्छ । राजमार्गमा ट्राफिक जाँचका क्रममा जुन रुटका चालकले लापसे गरेको पत्ता लाग्छ, कारबाहीका लागि सोही जिल्ला ट्राफिक प्रहरी कार्यालयमा पठाउँछौं ।’
सुवेदीले लापसे चेकिङलाई निरन्तर दिइने बताए ।
‘लापसे गरेका चालकको युरिन परीक्षण गर्दा अधिकांशले गाँजा सेवन गरेको देखियो,’ सुवेदीले लोकान्तरसँग भने, ‘लापसे गरेर सवारी हाँकेपछि दुर्घटना जोखिम बढिरहेको छ ।’
आर्थिक वर्ष २०८०/०८१ मा काठमाडौं उपत्यकाका उपत्यकाका ३ बाहेक बागमती प्रदेशका १० जिल्लामा २८ हजार २०२ सवारी चालक कारबाहीमा परेका थिए । ट्राफिक प्रहरीले कारबाहीबापत १७ करोड ७८ लाख १७ हजार राजस्व संकलन गरेको थियो ।
उक्त अवधिमा १ हजार ५३६ वटा सवारी दुर्घटना भएको थियो । दुर्घटनामा परी ३१५ जनाको मृत्यु भयो । ३ हजार १९९ जना घाइते भए ।
आर्थिक वर्ष २०७९/०८० मा १ हजार ३६२ वटा दुर्घटना भएको प्रहरीको तथ्यांक छ । दुर्घटनामा ३०४ जनाको मृत्यु भएको थियो ।
उक्त अवधिमा ट्राफिक प्रहरीले २ लाख ९१ हजार २९३ सवारीमाथि कारबाही गरेको थियो । कारबाहीबाट २६ करोड ३६ लाख ८३ हजार ५ सय राजस्व संकलन भएको थियो ।
यो आर्थिक वर्षको मंसिरसम्ममा ९२२ वटा दुर्घटना भएका छन् । दुर्घटनामा तीव्र गति तथा चालकको लापरबाही प्रमुख कारण रहँदै आएको छ ।
त्यस्तै, जीर्ण र कच्ची सडक, उकालो–ओरालो, साघुँरो र घुम्ती मोड, हुस्सु, कुहिरो, बाढीपहिरो र छाडा चौपायाका कारण समेत सवारी दुर्घटना हुने गरेको छ ।
दुर्घटना न्यूनीकरणका लागि ट्राफिक प्रहरीले राडार गनमार्फत स्पीड जाँच गर्दै आएको छ । साथै, लामो रुटका बसमा दुईजना चालक अनिवार्य गरिएको छ ।
हेर्नुहोस् कारबाहीमा परेकाहरूको विवरण
