चालु आर्थिक वर्षको अर्धवार्षिक प्रतिवेदन अनुसार बैंकहरू खराब कर्जाले दबाबमा देखिएका छन् । बैंकहरूले सार्वजनिक गरेको दोस्रो त्रैमास (साउनदेखि पुससम्म)को अपरिष्कृत वित्तीय विवरणले यस्तो तथ्य देखाएको हो । 

चालु आर्थिक वर्षको पहिलो ६ महिनामा वाणिज्य बैंकहरूको नाफा साढे ४ प्रतिशतको कमी आएको छ । औसतमा वाणिज्य बैंकहरूको खराब कर्जा ४.४८ प्रतिशत पुगेको छ । गत वर्षको सोही अवधिमा यस्तो कर्जा ३.३९ प्रतिशत रहेको थियो । यसका साथै केही बैंकहरूको खराब कर्जा साढे ५ प्रतिशतभन्दा माथि पुगिसकेको छ ।

अहिले बैंकहरूलाई कर्जा असुलीमा सकस भइरहेको नेपाल बैंकर्स संघका अध्यक्ष सन्तोष कोइराला बताउँछन् । कर्जा असुली प्रभावित हुँदा बैंकहरूको गैरबैंकिङ सम्पत्ति बढेर वितरणयोग्य नाफामा असर गरेको उनको भनाइ छ । 

‘खराब कर्जा बढेको छ । कर्जा असुलीमा चुनौती छ । जसले गर्दा बैंकहरूको खराब कर्जा र वितरणयोग्य नाफामा केही असर गरेको देखिन्छ’, अध्यक्ष कोइरालाले भने, ‘तर, खराब कर्जा बढ्दैमा आत्तिनुपर्ने अवस्था भने छैन । हामीले चाहेजस्तो लगानी हुन सकेको छैन ।’

खराब कर्जाको मारमा बैंकहरू
कर्जा रिकभरी हुन नसकेपछि बैंकहरूको खराब कर्जा बढेको छ । अर्धवार्षिक रिपोर्ट अनुसार तीन वाणिज्य बैंकहरूको खराब कर्जा ५ प्रतिशतभन्दा माथि पुगेको छ । दोस्रो त्रैमासमा नेपाल इन्भेस्टमेन्ट मेगा बैंक, प्रभु बैंक र लक्ष्मी सनराइज बैंकको खराब कर्जा ५ प्रतिशतभन्दा माथि छ ।

सबैभन्दा बढी ५.८६ प्रतिशत नेपाल इनभेस्टमेन्ट मेगा बैंकको रहेको छ । त्यस्तै, लक्ष्मी सनराइज बैंकको ५.६७ प्रतिशत र प्रभु बैंकको ५.०६ प्रतिशत पुगेको छ ।

खराब कर्जा बढ्दैमा बैंकहरूको अवस्था कमजोर नहुने नेपाल बैंकर्स संघका उपाध्यक्ष सुरेन्द्रराज रेग्मी बताउँछन् । बजारमा माग नै नभएकोले बैंकहरूको कर्जा प्रवाह अपेक्षित रूपमा बढ्न नसकेको उनको भनाइ छ ।

 
नाफामा गिरावट 
वाणिज्य बैंकहरूको खुद नाफामा प्रभाव परेको देखिएको छ । चालु आर्थिक वर्षको दोस्रो त्रैमाससम्म वाणिज्य बैंकहरूको खुद नाफा ४.६२ प्रतिशतले गिरावट आएको छ । दोस्रो त्रैमाससम्म वाणिज्य बैंकहरूले २७ अर्ब ४३ करोड ७९ लाख ९६ हजार रूपैयाँ खुद नाफा कमाएका छन् । जबकि गत वर्षको दोस्रो त्रैमाससम्म वाणिज्य बैंकहरूले २८ अर्ब ७६ करोड ५२ लाख ४० हजार रूपैयाँ खुद नाफा कमाएका थिए । जुन चालू आर्थिक वर्षमा १ अर्ब ३२ करोड ७२ लाख(४.६२ प्रतिशत) ले घटेको छ । 

 
दोस्रो त्रैमासको अन्तिम महिना पुसमा बैंक तथा वित्तीय संस्थाहरूको कर्जा प्रवाह बढेको देखिन्छ । पहिलो त्रैमाससम्म बैंकहरूको कर्जाको ब्याजदर न्यून हुँदा पनि कर्जा प्रवाह बढ्न सकेको थिएन । 

बैंकहरू पुरानै कर्जाको रिकभरीको दबाबमा थिए । पहिलो त्रैमासपछि बैंकहरूले केही मात्रामा कर्जा प्रवाह बढाएका छन् । 

पहिलो त्रैमाससम्म बैंक तथा वित्तीय संस्थाहरूबाट ५२ खर्ब ९६ अर्ब रूपैयाँ कर्जा प्रवाह भएको थियो । कात्तिकमा कर्जा प्रवाह घटेर ५२ खर्ब ८९ अर्बमा खुम्चिएको थियो । तर, मंसिरमा बैंक तथा वित्तीय संस्थाहरूले कर्जा प्रवाह ४४ अर्बले बढाएर ५३ खर्ब ३३ अर्ब पुर्‍याएका छन् ।

दबाबमा रहेका बैंक तथा वित्तीय संस्थाहरू पहिलो त्रैमासिकपछि लय समाउन थालेको देखिन्छ ।  चालु आवको शुरूआती महिनामा बैंक तथा वित्तीय संस्थाहरूबाट प्रवाह भएको ५१ खर्ब ७३ अर्ब रूपैयाँ ६ महिनामा बढेर ५४ खर्ब नाघेको छ । 

कर्जा निक्षेप अनुपातमा केही सुधार 
अपेक्षित रूपमा कर्जा प्रवाह बढ्न नसकेपछि बैंक तथा वित्तीय संस्थाहरूको कर्जा निक्षेप अनुपात ७८.२६ प्रतिशतसम्ममा झरेको थियो । जुन अहिले चालु आर्थिक वर्षको दोस्रो त्रैमाससम्म आइपुग्दा ७९.२१ प्रतिशत पुगेको छ । 

चालु आर्थिक वर्षको शुरूआतदेखि नै बैंकहरूको कर्जा–निक्षेप अनुपात (सीडी रेसियो) ७८.८० प्रतिशत थियो । भदौमा कर्जा निक्षेप अनुपात घटेर ७८.२६ प्रतिशतमा झरेको थियो । असोजमा केही बढेर सीडी रेसियो ७८.३६ प्रतिशत रहेको थियो । 

कात्तिकमा पुन: सीडी रेसियो ७८.२६ प्रतिशतमा झरेको थियो । मंसिरमा सीडी रेसियो केही बढेर ७८.५४ प्रतिशत रहेको थियो । जुन पुस मसान्तसम्म आइपुग्दा ७९.२१ प्रतिशत पुगेको छ ।