२८ जेठ २०८३, बिहीबार
वैदेशिक रोजगारका लागि विभिन्न देश पठाउने भन्दै ठगी गरेको आरोपमा प्रहरीले चार जनालाई पक्राउ गरेको छ ।
पक्राउ पर्नेमा सल्यानको छत्रेश्वरी गाउँपालिका-६ घर भई हाल काठमाडौं महानगरपालिका-१४ बस्ने २५ वर्षीय सुनिल दसौँदी, गोरखाको सहिद लखन गाउँपालिका-७ घर भई काठमाडौं महानगरपालिका-१६ बस्ने ३७ वर्षीय सुरेन्द्र विक रहेका छन् ।
यसैगरी, काभ्रेपलाञ्चोकको पाँचखाल नगरपालिका-५ घर भई ललितपुरको महालक्ष्मी नगरपालिका-५ बस्ने ३१ वर्षीय विकास दवाडी र काठमाडौंको गोकर्णेश्वर नगरपालिका-८ का २४ वर्षीय विशाखा पौडेललाई पनि प्रहरीको काठमाडौं उपत्यका अपराध अनुसन्धान कार्यालयले पक्राउ गरेको हो ।
प्रहरीका अनुसार दसौँदीले सर्विया पठाउने भन्दै एक जनाबाट २२ लाख ३८ हजार, विकले अमेरिका पठाउने भन्दै एक जनाबाट ९७ लाख ५४ हजार, दवाडीले जापान पठाउने भन्दै दुई जनाबाट तीन लाख र पौडेलले कुवेत पठाउने भन्दै एक जनाबाट एक लाख ६० हजार रकम ठगी गरेको प्रहरीले जनाएको छ ।
उनीहरूले पीडितलाई वैदेशिक रोजगारमा नपठाइ लामो समयसम्म सम्पर्कविहीन भएपछि प्रहरीमा जाहेरी परेको थियो । पीडितको जाहेरीपछि उनीहरूलाई काठमाडौं उपत्यकाका विभिन्न स्थानबाट पक्राउ गरिएको अपराध अनुसन्धान कार्यालयका सूचना अधिकारी, एसपी काजी कुमार आचार्यले जानकारी दिए ।
पक्राउ परेका चार जनामध्ये विकलाई थप अनुसन्धान तथा कारबाहीका लागि जिल्ला प्रहरी परिसर र बाँकी तीन जनालाई वैदेशिक रोजगार विभाग ताहाचल पठाइएको एसपी आचार्यले बताए ।
