२९ जेठ २०८३, शुक्रबार
राजश्व अनुसन्धान विभागले २५ करोड रूपैयाँ बराबरको विदेशी मुद्रा प्रकरणमा मुख्य आरोपी ठहर्याएका टोखानिवासी नारायण पौडेल यसअघि पनि विभिन्न तस्करीमा संलग्न हुने गरेको खुलेको छ ।
गत चैत ४ गते काठमाडौंको टोखाबाट बरामद भएको १३ लाख ७५ हजार १५० युरो र ३ लाख २० हजार ८५० अमेरिकी डलरका मुख्य मालिक पौडेल नै भएको राजस्व अनुसन्धान विभागको अनुसन्धानले पुष्टि गरेको छ ।
विभागका एक अधिकारीले मुख्य आरोपी पौडेलको घरमा मंगलबार छापा मारेर बैंक चेकहरू बरामद गरेको जानकारी दिए ।
उनले भने, ‘हामीले पौडेलले प्रयोग गर्ने मोबाइल नम्बरको सीडीआर, सीसीटिभी फुटेज र डिजिटल डिभाइस विश्लेषण गरेका थियौं । साथै उनको घर, कारोबारस्थल र गोदाम खानतलासी गरी विभिन्न प्रमाण जुटाइएको छ ।’
उनलाई पक्राउ गर्न प्रहरीले पक्राउ पूर्जीसमेत लिइसकेको जानकारी आफूलाई आएको उनले बताए ।
आपराधिक पृष्ठभूमि
सिन्धुपाल्चोक, भोटेकोशी गाउँपालिका-४ स्थायी ठेगाना भएका पौडेलको आपराधिक गतिविधिको शुरूआत खासाको व्यापारबाट भएको थियो ।
माओवादी शान्ति प्रक्रियामा आएपछि उनी रक्तचन्दन तस्करीमा संलग्न भएको उक्त वडाका एकजना जनप्रतिनिधिले लोकान्तरलाई बताए ।
यो धन्दाबाट राम्रो आम्दानी गरेका पौडेलले खासाको व्यापार सेलाउँदै गएपछि सुन तस्करीलाई आफ्नो मुख्य पेसा बनाए । उनलाई नजिकबाट चिन्नेहरूका अनुसार सुन तस्करी उनको नियमित धन्दा बनेको थियो ।
चैत ४ गते टोखाको झोरबाट प्रहरीले नियन्त्रणमा लिएको ट्रकमा फल्स बटम बनाई लुकाइएको २५ करोड बराबरको विदेशी मुद्रा बरामद भएपछि उनको संलग्नता पुष्टि भएको हो ।
ट्रक चालक कुसाङ लामासँगको उनको फोन सम्पर्क र सीडीआर विश्लेषणले यो प्रकरणमा उनको प्रत्यक्ष हात रहेको देखाएको विभागको दाबी छ ।
यसअघि पनि पौडेल विभिन्न आपराधिक प्रकरणमा मुछिएका थिए । २०५९ मा हङकङमा करोडौं डलर तस्करी गरेको आरोपमा उनी राजस्व अनुसन्धान विभागबाट पक्राउ परेका थिए ।
ऊन आयातको नाममा नेपाल इन्भेष्टमेन्ट बैंकबाट एलसी खोल्ने, तर ऊन आयात नगरी डलर तस्करी गर्ने उनको धन्दा त्यतिबेलै पर्दाफास भएको थियो ।
सोलु र पर्साका विभिन्न व्यक्तिको नाममा कम्पनी खोलेर उनले यो गैरकानूनी कारोबार सञ्चालन गरेका थिए । पक्राउपछि जेल बसेका पौडेलले ‘अदालतलाई मिलाएर’ छुटेको भोटेकोशी गाउँपालिका-४ का ती जनप्रतिनिधिले बताए ।
उनको तस्करीको सञ्जालमा अन्य व्यापारीको ठूलो समूह पनि संलग्न रहेको स्रोतको दाबी छ ।
जुवा अखडाका मालिक
यसबाहेक, २०८० को असार २ गते महाराजगञ्जस्थित एक घरमा जुवा अखडा चलाएको आरोपमा उनलाई प्रहरीले पक्राउ गरेको थियो ।
प्रहरी स्रोतका अनुसार प्रहरी वृत्त महाराजगञ्जले उनलाई १ लाख ९० हजार नगदसहित पक्राउ गरेको थियो । तर, त्यतिबेला उनका भाइ राजकुमार पौडेल र अन्य माओवादी नेताहरूको दबाबमा उनी छुटेका थिए ।
पौडेलका भाइ राजकुमार पौडेल २०७४ मा माओवादीबाट भोटेकोशी गाउँपालिकाको अध्यक्ष निर्वाचित भएका थिए भने अर्का भाइ बच्चु पौडेल हिमालय सीमापार व्यापार संघका अध्यक्ष छन् ।
परिवारको राजनीतिक पहुँच र प्रभावका कारण पटक-पटक पक्राउ परे पनि उनी उम्किँदै आएका छन् । हाल २५ करोड विदेशी मुद्रा प्रकरणमा पक्राउ गर्न प्रहरीलाई पत्राचार गरिए पनि पौडेल अहिलेसम्म फरार छन् । उनको खोजी तीव्र पारिएको प्रहरीले जनाएको छ ।
