२९ असार २०८३, सोमबार
विश्व पौडेललाई नेपाल राष्ट्र बैंकको गभर्नर बनाउन नमिल्ने जिकिरसहितको रिट दरपीठ गर्ने प्रशासनको निर्णयलाई सर्वोच्च अदालतले सदर गरिदिएको छ ।
पौडेललाई गभर्नर नियुक्त गर्न योग्यता नपुग्ने जिकिरसहित अधिवक्ता प्रतिभा उप्रेती र विशाल थापाले दायर गरेको रिट सर्वोच्च प्रशासनले दरपीठ गरिदिएको थियो ।
त्यसविरुद्ध परेको निवेदनमाथि सुनुवाइ गर्दै न्यायाधीश सपना प्रधान मल्लको इजलासले मंगलबार दरपीठ आदेश सदर गरिदिएको हो ।
राजनीतिक दलको कार्यकर्ता रहेकाले पौडेललाई गभर्नर बनाउन नमिल्ने जिकिर रिटमा गरिएको थियो ।
यद्यपि, कांग्रेसले भने काठमाडौं विश्वविद्यालयमा अध्यापनका लागि पौडेलले २ वर्षअघि नै क्रियाशील सदस्यता त्यागिसकेको दाबी गरेको छ ।
मंगलबार नै प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीच पौडेललाई गभर्नर बनाउने सहमति भएको छ ।
