नेकपा एमालेका उपाध्यक्ष तथा पूर्वअर्थमन्त्री विष्णुप्रसाद पौडेललाई हिरासतमा राखी अनुसन्धान गर्न विशेष अदालतले पाँचौंपटक म्याद थप गरेको छ ।

विशेष अदालतकी सूचना अधिकारी पार्वती हितानका अनुसार विशेष अदालतले पौडेललाई थप ३ दिन न्यायिक हिरासतमा राखेर अनुसन्धान गर्न सम्पत्ति शुद्धीकरण अनुसन्धान विभागलाई अनुमति दिएको हो ।

पौडेल सम्पत्ति शुद्धीकरण (मनी लाउन्डरिङ) मुद्दाको अनुसन्धानका क्रममा पक्राउ परेका हुन् ।

विशेष अदालतका सदस्यद्वय नारायणप्रसाद पौडेल र उमेश कोइरालाको इजलासबाट सोमबार उक्त म्याद थपको आदेश भएको हो ।

विभागले अनुसन्धान प्रक्रिया नसकिएको भन्दै थप अनुसन्धान प्रयोजनका लागि म्याद थप गर्न पौडेललाई अदालतसमक्ष पेस गरेको थियो ।