२९ जेठ २०८३, शुक्रबार
काठमाडौं उपत्यका अपराध अनुसन्धान कार्यालयमा एक युवक ‘म त ठगिएँ सर’ भन्दै उजुरी लिएर पुगे ।
पर्सास्थित वीरगञ्ज महानगरपालिकाका २८ वर्षीय अनिल पटेलले वैदेशिक रोजगारका लागि दुबई जाने भन्दै सिराहास्थित मिर्चैयाका राजेश कुमार महरालाई १ लाख ५४ हजार रुपैयाँ दिएका रहेछन् ।
राम्रोसँग पढ्न/लेख्न समेत नजानेका पटेलले महरालाई नगदै दिएका रहेछन् । महराले पासपोर्ट र भिसाका लागि सिराहाबाट पटेललाई काठमाडौं बोलाए । राहदानी बनाइदिए । इटहरिबाट दुबई जाने हो भन्दै पटेललाई महराले हवाईजहाज चढाएर विराटनगर ओराले । त्यहाँबाट इटहरि पुर्याएर एकसाता राखे । पटेल दिनभरि गेस्टहाउसमा बस्थे । महरा साँझ आउँथे । आज काम भएन, भोलि हुन्छ भन्थे । पटेल पत्याउँथे ।
एकसाता विराटनगरमा बसेपछि काठमाडौंैबाटै जहाजको टिकट मिल्ने भयो भन्दै पटेललाई महराले काठमाडौं ल्याए । कीर्तिपुरस्थित आफ्नै डेरामा राखे । केही दिन कीर्तिपुरमा बसेर पटेललाई महराले फेरि विराटनगर लगे । माइक्रोबस चढाएर इटहरि पुर्याएका पटेललाई पुनः गेस्टहाउसमै राखियो । एक सातापछि पुनः काठमाडौं ल्याइयो । यो क्रम तीनपटकसम्म चलिरह्यो । तर, पटेलले आफू ठगको फन्दामा परेको थाहा पाएनन् ।
जब महरा कीर्तिपुरको डेरा नै छाडेर भागे, अनि मात्रै पटेलले आफू ठगिएको थाहा पाए । उनी केही सीप नलागेपछि प्रहरी कार्यालय पुगे । टेकुस्थित अपराध अनुसन्धान कार्यालय पुगेका पटेललाई यति मात्रै थाहा थियो कि, उनलाई दुबई पठाइदिन्छु भनेर महराले १ लाख ५४ हजार नगद लिएका थिए । दुबई जाने भनेर ३ पटक इटहरि पुर्याएका थिए । उनले प्रहरीमा त्यही कुरा बताए । तर, पैसा दिएको प्रमाण उनीसँग थिएन ।
पटेलसँग खाना र खाजा खाने पैसा समेत थिएन । प्रहरीले उनलाई खाना र खाजा खुवाएर राखे । महरालाई खोज्दै जाँदा उनकी आमा ललितादेवी फेला परिन् । प्रहरीले आमालाई पनि कार्यालयमा बोलायो । शुरूमा ललितादेवी आफ्नो छोराले गलत काम गरेको छैन भनेर प्रहरीसँग कड्किइन् । महरा खै भनेर सोध्दा ललितादेवीले ‘ऊ त जेलमा छ’ भन्ने जवाफ दिइन् ।
महराले अर्का एक जनालाई पनि वैदेशिक रोजगारीमा पठाइदिने भनेर ५ लाख ठगी गरेका रहेछन् । काठमाडौं जिल्ला अदालतले महराविरुद्ध ५ लाख बिगो जरिवाना भराउन आदेश गरेको रहेछ । उक्त बिगो तिर्न नसकेपछि महरा जेल परेका रहेछन् । उनी हाल डिल्लीबजार सदरखोजमा जेल जीवन बिताइरहेको प्रहरी अनुसन्धानबाट खुलेको छ । महराकी आमाले पैसा दिएर सम्झौता गर्ने निर्णय गरेपछि बाहिर वकिलमार्फत उनले पटेललाई चेक दिइन् । उनीहरू मिलापत्र गरेर आ–आफ्नो बाटो लागे ।
टेकुस्थित काठमाडौं उपत्यका अपराध अनुसन्धान कार्यालयमा केही दिनअघि मात्रै घटेको घटना हो यो । ‘पटेल ठगिएको रकम त्यति ठूलो नभए पनि ठगले उनलाई दुबई भनेर इटहरि ३ पटक पुर्याएको देखियो,’ अनुसन्धान कार्यालयका प्रवक्ता एवं प्रहरी उपरीक्षक काजीकुमार आचार्यले लोकान्तरसँग भने, ‘राम्रोसँग लेख्न र बोल्न नजान्ने सोझासाझालाई ठग्ने प्रवृत्ति हो यो ।’
****
केही अघि मात्रै अनुसन्धान कार्यालयमा एउटा अर्को उजुरी परेको थियो । बुटवल बस्ने सम्झना (नाम परिवर्तन) र चितवन बस्ने दिनेश (नाम परिवर्तन) बीच सामाजिक सञ्जालमा चिनजान भयो । सम्झनाका पति कतारमा काम गर्थे । दिनेश चितवनमा बेरोजगार थिए ।
सामाजिक सञ्जालमा दिनेश र सम्झनाबीच कुराकानी हुन थाल्यो । दिनेशले आफू पनि कोरियामै बसेर आएको र फेरि जान लागेको बताए । त्यत्तिकैमा सम्झनाले ‘कोरिया जान के गर्नुपर्छ ?’ भनेर सोधिन् । दिनेशले कति पैसा छ ? भनेर साधे । सम्झनाले २०/२१ लाख छ भनिन् । आफूसँग विवाह गरे ‘डिपेन्डेन्ट’ भिसामा लैजाने भनेर दिनेशले सम्झनालाई फकाए ।
बुटवलबाट सम्झना काठमाडौं आइन् । दिनेश पनि काठमाडौं आए । दुवैजना होटलमा बसे । सम्झनाको राहदानी बनाइदिए । सम्झानालाई लिएर कोरियन एम्बेसीमा लगे । कुरा गरेको जस्तो गरेर एम्बेसीको झ्याल पुगेर दिनेश फर्किए । सबै प्रक्रिया मिल्ने भयो २१ लाख रुपैयाँ चाहिन्छ भनेर सम्झनालाई भने । सम्झनाले बैंकमा गएर २१ लाख नगद झिकेर दिनेशलाई दिइन् । होटलमा उनीहरू सँगै बसेका थिए ।
बिहानीपख दिनेशले आफू कोरियन एम्बेसीको मान्छे भेटेर आउँछु भनेर झोला बोेकेर हिँडे । तर, उनी फर्किएनन् । सम्झनाले कयौं प्रयास गर्दा पनि दिनेश सम्पर्कमा आएनन् । अनि मात्रै सम्झना अनुसन्धान कार्यालय पुगिन् । मोबाइलको कलडिटेल हेरेर दिनेशसँग सम्पर्क भएका मान्छे पहिल्याउँदै प्रहरी दिनेशसम्म पुग्यो । उनलाई बूढानीलकण्ठबाट पक्राउ गरेर ल्यायो । दिनेशले सम्झनासँग लिएको रकममध्येको १५ लाख रुपैयाँको चेक काटेर दिएपछि सम्झनाले मुद्दा नचलाउने बताइन् । बाँकी पैसाका लागि ३ महिनाको म्याद मागेर उनीहरू सहमतिमै फर्किए ।
अनुसन्धान कार्यालयका प्रवक्ता आचार्यका अनुसार धेरैजसो उजुरी वैदेशिक रोजगार ठगीसँग केन्द्रित रहेर आउने गरेका छन् । अमेरिका, रोमानिया, कतार, मलेसिया, दुबई, क्रोएसिया, फ्रान्स, पोर्चुगललगायतका मुलुकमा वैदेशिक रोजगारीका लागि पठाइदिने भन्दै रकम ठगी गर्नेविरुद्ध उजुरी पर्ने गरेको आचार्य बताउँछन् ।
‘वैदेशिक रोजगार ठगीका थुप्रै घटना सार्वजनिक भएपनि सर्वसाधरणमा भने अझै चेतना आउन सकेको देखिँदैन,’ अचार्यले भने, ‘ठगले पनि साँच्चिकै लैजाने नै जसरी प्रभावमा पारेर पीडितबाट पैसा असुल्ने र पछि फरार हुने गरेको देखिन्छ ।’
