०७ साउन २०८३, बिहीबार
पाकिस्तानको खैबर पख्तुनख्वा प्रान्तमा परेको अविरल वर्षापछि आएको आकस्मिक बाढीमा परी कम्तीमा ११ जनाको मृत्यु भएको छ ।
घटनामा अन्य ६ जना घाइते भएको प्रादेशिक विपद् व्यवस्थापन प्राधिकरण (पीडिएमए)ले पुष्टि गरेको छ । बाढीका कारण स्वात नदीको जलस्तर एकाएक बढेपछि व्यापक क्षति पुगेको स्थानीय अधिकारीहरूलाई उदृत् गर्दै अन्तर्राष्ट्रिय सञ्चारमाध्यमले जनाएका छन् ।
प्राधिकरणका अनुसार मृतकमध्ये ४ जना पुरुष, ३ जना महिला र ४ जना बालबालिका छन् । बाढीका कारण ५६ घरमा क्षति पुगेको छ, जसमा ६ घर पूर्णरूपमा ध्वस्त भएका छन् भने अन्य ५० घर आंशिक रूपमा क्षतिग्रस्त छन् ।
स्वात क्षेत्र बाढीबाट सर्वाधिक प्रभावित बनेको छ । त्यहाँ मात्र ११ जनाको मृत्यु पुष्टि भइसकेको छ । बाढीको स्तरलाई ‘अत्यन्त उच्च’ भन्दै पीडिएमएले सावधानी अपनाउन आग्रह गरेको छ । स्थानीय अधिकारीहरूका अनुसार बाढीले दर्जनौं मानिसलाई अलग–अलग स्थानमा फसाइदिएको छ ।
दुई दिनसम्म लगातार वर्षा भएपछि उद्दार र राहत कार्य जारी राखिएको छ । पाकिस्तानको प्रमुख दैनिक ‘द एक्सप्रेस ट्रिब्यून’का अनुसार, पीडिएमएले स्वातबाट सम्भावित बाढीको जोखिम रहेकाले पेशावर, चरसद्दा र नौशेराका अधिकारीहरूलाई सतर्क रहन निर्देशन दिएको छ ।
स्वातका डिप्टी कमिश्नर शहजाद महबुबका अनुसार नदीमा जलस्तर अकस्मात् बढेपछि ७३ जना विभिन्न स्थानमा फसेका छन् । उनले थप जानकारी दिँदै भने, ‘दुई पर्यटक परिवारका १८ जना स्वात नदीमा आएको बाढीका कारण शुक्रबार फसेका थिए, जसमा १७ जनाको ज्यान गएको पुष्टि भएको छ ।’
स्थानीय सञ्चारमाध्यमका अनुसार यो घटना फिजागत क्षेत्रको हो, जहाँ दुई परिवारका सदस्यहरू नदी किनारमै नास्ता गरिरहेका थिए । त्यसैबेला नदीको जलस्तर एकाएक बढ्दा उनीहरूलाई बगाएको जनाइएको छ । उद्दार कार्यका क्रममा ३ जनालाई सकुशल उद्धार गरिएको छ ।
