२८ जेठ २०८३, बिहीबार
शिक्षक, गुरु, मार्गदर्शक, सबमा समर्पित ।
ज्ञान, विद्या बाँड्नमा, सदा जो अनुबन्धित ।
गुरु बिनाको ज्ञान, मानिन्छ अधुरो लोकमा।
समर्पण र त्यागले मात्र गुरु कहलिन्छ जगतम।
महिमा गुरुको छ, सबै लोकमा चर्चित ।
शिष्य बिग्रनु सप्रनु यावत, गुरुमै आश्रित ।
विद्यालय, पाठशाला सबैमा मनाइन्छ हर्षले ।
पूर्णिमाको महत्व नै, गुरुजनको कठोर त्यागले ।
त्यागबिना गुरु बन्छु, सोच हो मूर्खको ।
ज्ञान सदा अद्यावधिक, पेशा धर्म गुरुको ।
सिक्नु, सिकाउनु गुरुमा, छ गुण निरन्तर ।
गुरु पूज्य छ लोकमा, कर्तव्यनिष्ठ बराबर ।
मानवमा लोभ स्वार्थ छ र पनि गुरुमा हुँदैन।
पैसा र सम्मानको भोकले, गुरु कर्म चल्दैन ।
गुरु मानौं पुजौं सबले, लियौ ज्ञान तनमनले ।
गुरु बनौं, त्यागी रहौं, पवित्र सोच भावले ।
कमाउन रमाउन, गुरुलाई पनि मन हुँदो हो ।
निश्चित कमाइ, अनिश्चित खर्च कति मन रुँदो हो ।
पूर्णिमालाई सच्चा दिलले, मनाउनु धर्म हो ।
मर्म बुझ्ने शिष्य पाउनु, गुरुको अहोभाग्य हो ।
देश बिग्रियो, सन्तान कुबाटोमा, सबै दोष गुरुको
मातापिता नियालौं सदा, गतिविधि सन्तानको ।
कोटी–कोटी प्रणाम छ, सबैजना सम्मानित गुरुमा
आर्शीवाद शुभकामना, मेरो सब प्रिय शिष्यमा ।
