२५ जेठ २०८३, सोमबार
नेपाली कांग्रेसका वरिष्ठ नेता डा. शेखर कोइरालाले संघीय निजामती विधेयकमा नेकपा एमालेका सांसदहरूद्वारा हालिएको संशोधनप्रति आपत्ति जनाएका छन् ।
उनले आइतबार साँझ सामाजिक सञ्जालमार्फत एमालेले दोहोरो चरित्र देखाएको बताएका हुन् । ‘गठबन्धनका दलबीच भएको सहमति र समितिमा भएको सम्मतिविपरीत आफ्ना सांसदहरूलाई संशोधन हाल्न लगाउनु एमालेको दोहोरो चरित्र मात्र नभई उसले देश, जनता, लोकतन्त्र र गठबन्धनलाई दिएको धोका हो,’ कोइरालाले एक्समा आपत्ति जनाउँदै लेखेका छन् ।
साथै त्यस विषयमा नेपाली कांग्रेसले एमालेको आधिकारिक धारणा माग गर्नुपर्ने उनको भनाइ छ ।
‘नेपाली कांग्रेसले यस सम्बन्धमा एमालेको आधिकारिक धारणा माग गर्नुपर्छ । साथै सबै मिलेर एमालेले हालेको संशोधन पास हुन दिनु हुन्न । कुलिङ पिरियड रहन्छ, रहन्छ र रहन्छ । कोही दुविधामा नपरे हुन्छ,’ कोइरालाले थप लेखेका छन् ।
