काठमाडौंको माछापोखरीमा मध्यरातमा गुण्डागर्दी गर्ने चार जनालाई प्रहरीले पक्राउ गरेको छ । 

माछापोखरीमा रहेको राजधानी रोधीघरमा पुगेका उनीहरूले युवतीमाथि अश्लील हर्कत देखाउनुका साथै धारिलो हतियार प्रदर्शन गरी धाकधम्की दिएका थिए । पीडितले प्रहरीलाई बताए अनुसार उनीहरूले त्यहाँ कार्यरत युवतीमाथि हातपातको प्रयास समेत गरेका थिए । 

घटना मंगलबार मध्यराति १२ :४० बजेतिरको हो । चार जनाको समूह होहल्ला गर्दै पुगेर अभद्र व्यवहार गरेपछि प्रहरी बोलाइएको थियो । घटनाबारे खबर पुग्नेबित्तिकै काठमाडौं उपत्यका अपराध अनुसन्धान कार्यालयबाट खटिएको प्रहरीले चारै जनालाई रोधीघरको बाहिरबाट पक्राउ गरेको हो ।

पक्राउ पर्नेमा मकवानपुरको हेटौँडा उपमहानगरपालिका-५ घर भई हाल काठमाडौंको टोखा नगरपालिका-३ सूर्यदर्शन हाइट बस्ने ३७ वर्षीय दीपक कार्की, नुवाकोटको ककनी गाउँपालिका-५ घर भई हाल काठमाडौंको टोखा नगरपालिका-३ बस्ने निरज गुरुङ, टोखा  सरस्वती टोल बस्ने २८ वर्षीय रोशन डंगोल र टोखा गणेशस्थान बस्ने २४ वर्षीय रोहन डंगोल रहेका अपराध अनुसन्धान कार्यालयका प्रवक्ता, एसपी काजी कुमार आचार्यले जानकारी दिए । 

उनीहरूलाई राति १ बजेको समयमा प्रहरीले पक्राउ गरेको थियो । पक्राउपश्चात तत्कालै पीडितलाई बोलाई प्रहरीले सनाखत गरेको थियो । 

पक्राउ परेकामध्ये निरज गुरुङ र रोशन डंगोल पटके अभियुक्त रहेका पाइएको छ । प्रहरी अभिलेख अनुसार निरज यसअघि पाँच पटक र रोशन दुई पटक पक्राउ परिसकेका छन् ।

रोशनलाई २०७३ फागुन ६ गते सार्वजनिक अपराध र २०८० चैत २२ गते ज्यान मार्ने उद्योग कसुरमा प्रहरी वृत्त महाराजगञ्जले पक्राउ गरेको थियो । आवश्यक कानूनी कारबाहीपछि उनी छुटेका थिए ।

निरजलाई भने २०७६ पुस २२ गते प्रहरी वृत्त महाराजगञ्जले पक्राउ गरेको प्रहरी अभिलेख छ । महरागञ्ज वृत्तले नै उनलाई २०८१ असोज २४ गते ज्यान मार्ने उद्योगमा पक्राउ गरेको थियो ।

यसैगरी, प्रहरी वृत्त लैनचौरले उनलाई २०८० असार १७ र २०८१ असोज ७ गते अभद्र व्यवहार कसुरमा पक्राउ गरेको थियो । यस्तै उनलाई अभद्र व्यवहार कसुरमै प्रहरी वृत्त बालाजुले २०८० असोज ५ गते पक्राउ गरेको थियो ।

प्रहरीका अनुसार कला क्षेत्रमै कार्यरत ती युवती आफ्नो दाइको रोधीघरमा पुगेकी थिइन् । सोही रोधीघरमा पुगेका युवाहरूले उनमाथि अश्लील हर्कत गरेका प्रहरी बताउँछ ।