०८ साउन २०८३, शुक्रबार
ब्राजिलको सान्ता कातारीनास्थित रियो दो सुलको अल्टो भाले क्षेत्रीय अस्पतालमा साधारण ‘कन्ट्रास्ट–एन्हान्स्ड’ सिटी–स्क्यान गराउँदै गर्दा २२ वर्षीया लेटिसिया पलको मृत्यु भएको छ ।
कानुनमा स्नातक गरेकी लेटिसियाको एलर्जीजन्य गम्भीर प्रतिक्रिया (एनाफिल्याक्सिस)का कारण मृत्यु भएको स्थानीय सञ्चारमाध्यमहरूले जनाएका छन् ।
स्थानीय सञ्चारमाध्यमका अनुसार स्क्यान शुरू हुनुअघि शारीरिक सञ्जाल र अंगहरू स्पष्ट देखिने बनाउन शिराबाट ‘आयोडिनयुक्त कन्ट्रास्ट’ प्रवाह गरिएको थियो ।
सोही आयोडिनका कारण उत्पन्न एलर्जीले उनलाई तुरुन्तै श्वासप्रश्वासमा समस्या देखियो र अचेत बन्न पुगिन् । अस्पतालले तत्काल सघन उपचारका हिस्सामा इन्क्युबेसनसमेत गरेको तर शुरूको २४ घण्टाभित्रै उनको ज्यान बचाउन नसकिएको जनाइएको छ ।
उनीलाई पटक–पटक मृगौलाको पत्थरी जस्ता समस्या रहेकाले चिकित्सक सिटी–स्क्यानमार्फत विस्तृत जाँचमा लागेका थिए ।
परिवारजनले स्थानीय सञ्चारमाध्यमलाई बताएअनुसार स्वास्थ्य परीक्षण सामान्य प्रक्रिया नै भए पनि एलर्जीले आकस्मिक रूप लिँदा उनको मृत्यु भएको हो ।
लेटिसिया हालै कानुनमा स्नातक हासिल गरी रियल स्टेट कानुनमा स्नातकोत्तर अध्ययनतर्फ उन्मुख थिइन् । तिनको शिक्षालयले विज्ञप्तिमार्फत शोक प्रकट गर्दै परिवार र साथीहरूलाई समवेदना प्रकट गरेको छ ।
अल्टो भाले क्षेत्रीय अस्पतालले प्रक्रिया सिफारिस गरिएका क्लिनिकल प्रोटोकलअनुसारै गरिएको दाबी गरेको छ । अस्पतालले नैतिकता, पारदर्शिता र उपचार–सुरक्षाप्रतिको प्रतिबद्धता दोहोर्याउँदै घटनाबारे सरोकारवालासँग सहानुभूति व्यक्त गरेको छ ।
चिकित्सा अभ्यासमा आयोडिनयुक्त कन्ट्रास्ट व्यापक रूपमा सुरक्षित मानिन्छ । तर, दुर्लभ अवस्थामा गम्भीर एलर्जी देखिन सक्छ, जसको सम्भावना करिब ५ हजारदेखि १० हजारमध्ये एकजना सम्ममा मात्र देखिन्छ ।
सामान्यतया अधिकांश बिरामीमा तातोपन महसुस हुनु, अलिअलि वाकवाकी लाग्नु वा छालामा चिलाउनेजस्ता सामान्य लक्षण देखिएर केही समयमा हराउँछन् ।
यद्यपि, रोगको इतिहास, शरीरको संवेदनशीलता र आकस्मिक प्रतिक्रिया हुने जोखिमलाई ध्यानमा राखी अस्पतालहरूले कडाइका साथ निगरानी र आकस्मिक व्यवस्थापनको तयारी राख्नुपर्ने विशेषज्ञहरू बताउँछन् ।
