०९ साउन २०८३, शनिबार
नयाँदिल्लीस्थित भारतीय प्रधानमन्त्री निवास बाहिर विरोध प्रदर्शन गर्ने क्रममा पक्राउ परेका कांग्रेस नेता राहुल गान्धीसहितका विपक्षी नेताहरू रिहा भएका छन्।
मंगलबार दिउँसो ३:३० बजेदेखि धर्नामा बसेका राहुल, प्रियंका गान्धी र अखिलेश यादव लगायतका नेताहरूलाई प्रहरीले करिब ३ घण्टापछि नियन्त्रणमा लिएर राति पौने १० बजे रिहा गरेको हो।
निट परीक्षामा भएको भनिएको धाँधली र पेपर लिकको विरोध गर्दै शिक्षा मन्त्री धर्मेन्द्र प्रधानको राजीनामा माग गरेर विपक्षी नेताहरू प्रधानमन्त्री निवास घेर्न पुगेका थिए। उच्च सुरक्षा क्षेत्रमा धर्ना बसेपछि प्रहरीले राहुल गान्धीलगायतलाई नियन्त्रणमा लिएको थियो ।
हिरासतबाट रिहा भएपछि प्रियंका गान्धीले विद्यार्थीको आवाज उठाउनु जनप्रतिनिधिको जिम्मेवारी भएको र शिक्षा मन्त्रीले राजीनामा नदिएसम्म आन्दोलन नरोकिने बताइन्।
यता, भाजपाले भने राहुल गान्धीले अराजकता फैलाउन खोजेको आरोप लगाएको छ। राहुलले सामाजिक सञ्जालमार्फत विद्यार्थीको न्यायका लागि लडाइँ जारी रहने उल्लेख गरेका छन्।
