१२ साउन २०८३, मंगलबार
नेपाली कम्युनिस्ट पार्टी (नेकपा)का संयोजक एवं पूर्वप्रधानमन्त्री पुष्पकमल दाहाल 'प्रचण्ड'ले साम्राज्यवादीहरूले नेपाली जनतालाई अफिम खुवाएर भदौ २४ को घटना गराएको आरोप लगाएका छन् ।
सामाजिक सञ्जालमा अल्गोरिदमको म्यानिपुलेसनमार्फत नेपाली युवालाई अफिमको नसामा जस्तै लठ्ठ पारेको उनको टिप्पणी छ ।
पुष्पलालको स्मृति दिवसका अवसरमा शुक्रबार काठमाडौंमा आयोजित कार्यक्रममा प्रचण्डले चिनमा जस्तै नेपालमा पनि अफिम युद्ध लड्नु पर्ने अवस्था आएको बताएका हुन् ।
‘मैले अस्ति एउटा कार्यक्रममा भनेको थिएँ, चिनिया क्रान्तिको इतिहासमा अफिम युद्ध भएको थियो । साम्राज्यवादीहरूले चिनिया जनतालाई अफिमको लत बसाइदिने । लठ्ठ पारेपछि सबै स्रोत साधन लुट्ने गरेका थिए,’ प्रचण्डले भने, ‘यो पटक हाम्रो गल्तीका र कमजोरीमा टेकेर नेपाली जनतालाई अफिम खुवाएछन्, कस्तो अफिम भन्दा–सोसल मिडियाबाट अल्गोरिदम म्यानिपुलेसन । त्यो अफिम नै हो, अफिम खुवाएर लट्ठ पारे ।’
युवाहरूलाई अफिमको नसामा पारेर भदौ २४ को घटना घटाइएको उनको भनाइ थियो । ‘चीनमा जस्तै हामीले पनि अफिम युद्ध चलाउनु पर्ने भएको छ, जुन दिन अफिमको नसाबाट मुक्त भएपछि चीनमा क्रान्ति अगाडि बढेको थियो । यहाँ पनि सोसल मिडियामा लठ्ठ भएका युवा त्यसबाट मुक्त हुन्छन्, राष्ट्रको स्वाधीनताको लागि फेरि बलिदान गर्ने आट गर्छन्,’ प्रचण्डले भने ।
पूर्वप्रधानमन्त्री प्रचण्डले वैरीहरूले एकै दिनमा नेपाललाई विश्वंश गर्छन् भनेर आफूहरूले कल्पनासमेत नगरेको बताए । ‘वैरी लागेका छन् भन्ने थाहा पाइन्थ्यो, एकै दिनमा नेपाललाई विश्वंश पार्छन् भन्ने लाग्दैनथ्यो, हामीले भ्रम पालिएछ,’ उनले भने, ‘राष्ट्रको स्वाधीनताका लागि शक्ति आर्जन र सञ्चय गर्नुपर्ने कामबाट हामी विमुख हुँदा, त्यसैको परिणाम उनीहरूले तयारी गरे । उनीहरूले बकाइदा तयारी गरे हाम्रा युवाको दिमाग कसरी क्याप्चर गर्ने भन्नेमा तयारी भएछ ।’
