१० साउन २०८३, आइतबार
रोल्पाको सुनछहरी गाउँपालिका–१ सेरमस्थित दवाङ लेकमा पहिरोमा पुरिएर दुई महिलाको मृत्यु भएको छ भने एक जना घाइते भएका छन् ।
शनिबार दिउँसो करिब १:१० बजे गाईबाख्रा चराइरहेका बेला माथिबाट एक्कासी पहिरो खस्दा गोठालासहित पशुचौपाया पुरिएका थिए ।
सुनछहरी गाउँपालिका–१ की करिब ५१ वर्षीया असौजी घर्ती मगर र करिब ३६ वर्षीया अमरा घर्ती मगरको शव पहिरोबाट निकालिएको जिल्ला प्रहरी कार्यालय रोल्पाका सूचना अधिकारी, प्रहरी निरीक्षक राजन चन्दले जानकारी दिए ।
घटनामा करिब ६० वर्षीय कुले घर्ती मगर घाइते भएका छन् । उनको शरीरका विभिन्न भागमा चोट लागेको र उपचारका लागि सेरम स्वास्थ्य चौकी पठाइएको प्रहरी निरीक्षक चन्दले लोकान्तरलाई जानकारी दिए । घर्तीको अवस्था मध्यम रहेको बताइएको छ ।
पहिरोमा पुरिएका चार वटा बाख्रा र दुई वटा गाई निकालिएको छ । ती चौपाया मृत अवस्थामा निकालिएको प्रहरीले जनाएको छ । अन्य पुरिएका चौपायाको खोजी तथा निकाल्ने कार्य जारी रहेको छ ।
स्थानीयवासीका अनुसार गोठालामा तीन जना मात्र गएको प्रारम्भिक जानकारी प्राप्त भएको प्रहरीले जनाएको छ । घटनाबारे थप अनुसन्धान भइरहेको प्रहरीले जनाएको छ ।
