नेपाल नेत्र ज्योति संघद्वारा सञ्चालित रुपन्देहीको भैरहवास्थित श्री रण अम्बिका शाह आँखा अस्पतालबाट पाँच वर्षको अवधिमा झण्डै १५ लाख बिरामीले उपचार सेवा लिएका छन् । 

आर्थिक वर्ष २०७७/०७८ देखि २०८१/०८२ सम्ममा १४ लाख ७७ हजार १७४ जनाको आँखाको उपचार भएको अस्पताले जनाएको छ । 

अस्पतालका सूचना अधिकारी प्रतीक पाण्डेयका अनुसार आव २०७७/०७८ मा एक लाख ५३ हजार ५३३, २०७८/०७९ मा दुई लाख ८२ हजार २३७, २०७९/०८० मा तीन लाख २८ हजार ८४०, २०८०/०८१ मा तीन लाख २९ हजार ५११ र २०८१/०८२ मा तीन लाख ८३ हजार ५३ जनाको उपचार गरिएको हो । 

अस्पतालको तथ्यांक अनुसार उपचारका लागि आउनेको सङ्ख्या क्रमशः वृद्धि हुँदै गएको देखिन्छ ।     
     
त्यस्तै, आर्थिक वर्ष २०८१/०८२ मा २८ हजार ७६१ जनाको मोतियाविन्दुको शल्यक्रिया गरिएको सो अस्पतालका सहव्यवस्थापक तुल्सीप्रसाद पराजुलीले जानकारी दिए । 

यसैगरी, आँखाको पर्दा फाटेका, आँसु आउने नली र आँखाको डेढोपनको समस्या झेलिरहेका १० हजार ६०६ जनाको शल्यक्रिया गरिएको सहव्यवस्थापक पराजुलीले बताए । उनका अनुसार उल्लिखित सेवा लिन आउनेमा ५० प्रतिशतभन्दा बढी नेपाली रहेको छन् ।

सो अस्पतालले गत वर्षदेखि नाक, कान तथा घाँटी रोग (ईएनटी) विशेषज्ञ सेवासमेत प्रदान गर्दै आएको पराजुलीले जानकारी दिए । उनका अनुसार हालसम्म आठ हजार बढीले यो सेवा लिइसकेका छन् ।

२०४० सालदेखि सञ्चालनमा आएको यस अस्पतालले नेपालका विभिन्न जिल्लासँगै भारतीय बिरामीलाई समेत सेवा दिँदै आएको छ ।  

यसैगरी सो अस्पतालले विभिन्न स्थानमा निःशुल्क आँखा परीक्षण शिविरसमेत सञ्चालन गर्दै आएको सूचना अधिकारी पाण्डेयले जानकारी दिए ।