२५ जेठ २०८३, सोमबार
प्रधानमन्त्री सुशीला कार्कीले कर्मचारीलाई उच्च मनोबलले काम गर्न सुझाउँदै आएकी छिन् ।
‘सर्भिस डेलिभरी’ मा दाँयाबाँया नगरी काम गर्न उनले मुख्यसचिव एकनारायण अर्याललाई पटक–पटक निर्देशन समेत दिइसकेकी छन् ।
कार्कीको निर्देशन मुख्यसचिव हुँदै सचिव र जिल्लाका सिडियोसम्म पुगिसक्यो । तर, कर्मचारीको मनोबल कार्कीले भनेजस्तो सजिलै उकासिने छाँटकाँट देखिएको छैन ।
जेनजीका नाममा अहिले दैनिकजसो सचिव र सिडियोहरू (सहसचिव र उपसचिव)लाई धम्की दिने काम भइरहेको स्रोत बताउँछ । उसै पनि कर्मचारीलाई सोलोडोलो विश्लेषण गर्दैै ‘भ्रष्ट’को पगरी गुथाउने प्रवृत्ति छ ।
जेनजी आन्दोलनको मुख्य माग पनि भ्रष्टाचार नियन्त्रण नै हो ।
तर, अहिले जेनजीको नाम लिएर हरेक कुरामा अड्को थाप्ने काम भइरहेको संघीय मामिला तथा सामान्य प्रशासन मन्त्रालयका एक उच्च अधिकृतले लोकान्तरसँग बताए ।
ती अधिकृतले भने, ‘हामीले काम गर्ने अवस्था भएन, सरुवा गरिदिनुस् भन्दै कर्मचारीले फोन गर्न थालेका छन् । विगतमा अतिरिक्त समूहमा राख्दा कर्मचारीलाई थन्क्याइयो भनिन्थ्यो, अहिले तिनै कर्मचारी अतिरिक्तमा बस्न रुचाएका छन् । स्थानीय तहका कर्मचारीलाई समेत धम्की दिन थालेको सूचना आएको छ ।’
केही दिनअघि मात्रै सचिवहरूले मुख्यसचिवलाई संयुक्त रूपमा भेटेर निराशा पोखेका थिए ।
‘जेनजीका नाममा हाम्रा कोठा–कोठा पुगेर धम्क्याउने, तर्साउने गतिविधि हुन्छ भने हामी काम गर्न सक्दैनौं,’ भन्दै सचिवहरूले गुनासो गरेका थिए ।
मुख्यसचिव अर्यालले ‘परिस्थिति सामान्य बन्दै जान्छ, अहिले आत्तिहाल्नुपर्ने अवस्था छैन’ भनेर सम्झाएको एक सचिवले लोकान्तरलाई जानकारी दिए ।
राजनीतिक नियुक्ति पाएकालाई मात्र होइन, स्थायी कर्मचारीहरूलाई पनि धम्क्याएर राजीनामा दिन दबाब दिने क्रम बढेको कर्मचारीहरू बताउँछन् ।
पछिल्लोपटक नागरिक उड्डयन प्राधिकरणका महानिर्देशक प्रदीप अधिकारीलाई मार्गप्रशस्त गर्न भन्दै धम्की दिएको घटना बाहिरिएको थियो । त्यति मात्रै होइन, उनीमाथि दुर्व्यवहार नै भयो । ललितपुर प्रहरीले तीन जनालाई पक्राउ गरेर अनुसन्धान गरिरहेको छ ।
अधिकारी मात्रै होइन, अन्य उच्चपदस्थलाई पनि जेनजीका नाममा धम्की दिने काम भइरहेको छ । सिंहदरबारभित्र गृह मन्त्रालयका कर्मचारीहरूमा धेरै ‘फ्रस्टेसन’ देखिएको स्रोत बताउँछ ।
‘दैनिकजसो जेनजीका नाममा कुनै न कुनै समूहले मन्त्री र सचिवलाई भेटेर निर्देशनमाथि निर्देशन दिइरहेका हुन्छन्,’ मन्त्रालयका एक अधिकृतले भने, ‘मन्त्री र सचिवको काम नै जेनजीलाई भेटेर उनीहरूका कुरा सुन्ने र सोहीअनुसार कर्मचारीलाई निर्देशन दिनेमा सीमित छ । हामीले कसको कुरा सुन्ने ?’
त्यसो त सार्वजनिक प्रशासन रुपान्तरण अभियान– २०८२ नै घोषणा गरेर केही कर्मचारीहरूले प्रधानमन्त्री सुशीला कार्कीलाई ज्ञापन पत्र बुझाइसके ।
उनीहरूले हालको प्रशासनिक नेतृत्वबाट रुपान्तरण सम्भव नहुेन जिकिर गर्दै उच्च प्रशासकीय नेतृत्वकर्तासहित मतियारको रूपमा काम गर्ने जिम्मेवार पदाधिकारी एवं कर्मचारीहरूले तत्काल मार्ग प्रशस्त गर्नुपर्ने माग गरेका थिए । प्रशासनिक नेतृत्व मुख्यसचिव एकनारायण अर्याल हुन् ।
मातहतका कर्मचारीले नै बर्खास्तीको माग गरेपछि कर्मचारी वृत्तमा यसले खैलाबैला मच्चिएको थियो । तर, अभियानमा रहेका कर्मचारीको पृष्ठभूमि विवादास्पद रहेको ‘ब्रिफिङ’ प्रधानमन्त्री कार्कीसमक्ष पुगिसकेको छ ।
‘कोही हिजो श्रममा बसेका, कोही मालपोतमा बसेका, कोही सिंहदरबारमै लामो समय बिताएका र कोही अख्तियारको कारबाहीमा परेका व्यक्तिहरू अभियानमा लागेका छन्,’ उच्च स्रोतले भन्यो, ‘आफू जिम्मेवारी पनि नलिने र भएको संरचनालाई पनि भत्काएर कर्मचारी वृत्तलाई पेवा सम्झनेहरूका बारेमा मुख्यसचिव राम्रोसँग जानकार हुनुहुन्छ ।’
पूर्वसचिव अर्जुनजंग थापा जेनजीका नाममा कर्मचारी धम्क्याउने र तर्साउने कामलाई सरकारले नियन्त्रण गर्नुपर्ने बताउँछन् ।
उनले लोकान्तरसँग भने, ‘अहिलेको सरकार जेनजीकै विद्रोहबाट बनेको हो । कर्मचारी दोषी छन् भने सरकारकै संयन्त्रले कारबाही गरे भइहाल्यो नि, कार्यालय/कार्यालय छिरेर जेनजीका नाममा धम्की दिने काम हुनु हुँदैन । यसले कर्मचारीको मनोबलमा असर पर्छ । यो कार्यलाई नियन्त्रण गर्नुपर्छ ।’
पूर्व सचिव थापाका अनुसार विगतमा ट्रेड युनियनका नाममा कर्मचारीहरूले आफूनिकट दलका सरकार आउनेबित्तिकै सेवासुविधा लुटिरहेका थिए ।
अब बन्द हुने भएपछि अभियान सञ्चालनका नाममा अर्को ट्रेड युनियन बनाएर मौका छोप्ने रणनीतिमा केही कर्मचारी लागेको थापा बताउँछन् ।
‘जो उपत्यका बाहिर सरुवा हुन चाहँदैनन्, लामो समय रोजी–रोजी कार्यालयमा सरुवा भएर सुविधा लिन्छन् वा भनौं विगतमा तर मारेको छन्, अहिले अभियानका नाममा फेरि तर मार्न खोजेका छन्,’ थापाले भने ।
