‘जहाँबाट आतिथ्यको शुरूआत हुन्छ’ भन्ने मूल मन्त्रसहित नेपाली हस्पिटालिटी उद्योगमा अग्रणी भूमिका निर्वाह गर्दै आएको होटल पौवाले आफ्नो १६औं शाखा चितवनको भरतपुरमा सञ्चालनमा ल्याउने भएको छ ।

नयाँ शाखाको उद्‌घाटनसँगै तीन दिनसम्म वृहत् नेपाली खाना प्रवर्द्धन (Food Exhibitio) कार्यक्रम हुने भएको छ ।

कात्तिक २७, २८ र २९ गतेसम्म चल्ने उक्त वृहत् नेपाली खाना प्रदर्शनीमा देशभरका पौवाका शाखाबाट आएका सेफहरूले आफूले तयार पारेका खाद्य कला पस्किने छन् ।

होटल पौवाको ब्रान्डिङ विभाग प्रमुख विष्णु भण्डारीका अनुसार उद्‌घाटन समारोह र खाना प्रवर्द्धनका लागि चितवन, नवलपुर र आसपासमा झण्डै ४० हजार पाहुनालाई निमन्त्रणा गरिएको छ ।

'पौवाको विशिष्ट स्वाद, नेपालीपनको सेवा र आतिथ्यको वास्तविक अनुभव सहभागीहरूले प्रत्यक्ष रूपमा लिन सक्नेछन्,' भण्डारीले भने ।

भरतपुर शाखामा १७ वटा लक्जरी कोठासहितको छुट्टै ब्लक रहेको छ ।

आकर्षक रेस्टुरेन्ट, बालबालिकाका लागि खेल्ने ठाउँ, सुन्दर गार्डेन र प्रशस्त पार्किङ सुविधा रहेको छ ।

विवाह, ब्रतबन्ध तथा कर्पोरेट कार्यक्रमका लागि दुई वटा विशाल हल, साना बैठक र पारिवारिक भेटघाटका लागि १० वटा फरक–फरक क्षमताका हल उपलब्ध रहेको उनले जानकारी दिए । 

निकट भविष्यमै थप १२ कोठाको सुविधासम्पन्न आवास भवन निर्माणको चरणमा छ ।

यसका साथै, सौराहा, मौलाकाली, मनकामना र अन्य धार्मिक तथा पर्यटकीय गन्तव्यहरू समेटिएका विशेष टुर प्याकेजहरू पनि शाखाले प्रदान गर्नेछ । भरतपुरको मध्यभागमा अवस्थित पौवाले आतिथ्य उद्योगका सबै विधामा सेवा प्रदान गरेको छ ।

मंगलबार आयोजित पत्रकार सम्मेलनमा होटल पौवाका अध्यक्ष दुर्गाप्रसाद भण्डारीले चुनौतीपूर्ण लगानी वातावरणका बीच पनि पौवाले पर्यटन र आतिथ्य व्यवसायलाई देशव्यापी रूपमा विस्तार गरिरहेको बताए । उनले भने, 'नेपाल पर्यटकीय सम्भावनाले भरिएको मुलुक हो । यहाँ आउने हरेक पर्यटकलाई पहिलो अनुभव नै हस्पिटालिटीको हुनुपर्छ । त्यसैले पौवाले ‘आतिथ्यता र स्वाद’लाई आफ्नो मिसनको केन्द्रमा राखेको छ ।'

पछिल्लो समयको राजनीतिक आन्दोलन र आर्थिक अनिश्चितताले लगानीकर्तामा असर पारे पनि पर्यटन क्षेत्रको गति रोक्नु नहुने धारणा पौवाको रहेको छ । 'हामीले अब हिच्किचाउने होइन, अघि बढ्ने समय आएको छ । तर, राज्यले उद्योगी व्यवसायीलाई लगानी मैत्री वातावरण रहेको विश्वास दिलाउनुपर्छ,' उनले भने ।

त्यसैगरी, होटल पौवाका उपाध्यक्ष ध्रुवराज न्यौपानेले नेपाली स्वादलाई विश्वस्तरमा पुर्‍याउने अभियानमा पौवा अघि बढिरहेको उल्लेख गरे । उनले भने, 'नेपालमा ‘केही हुँदैन’ भन्ने सोच तोड्नुपर्छ । विषम परिस्थितिमा पनि हामीले एक सय शाखा विस्तार गर्ने लक्ष्यसहित नेपाली चेन होटललाई अन्तर्राष्ट्रिय करणतर्फ डोर्‍याइरहेका छौं ।'​

न्यौपानेका अनुसार पर्यटकमैत्री नीति, पूर्वाधार विकास र निजी क्षेत्रको लगानीलाई सरकार र समाजले साथ दिन सके नेपाल छिट्टै विश्वकै आकर्षक पर्यटन गन्तव्य बन्न सक्छ ।

होटल पौवाका प्रबन्ध निर्देशक विष्णु ज्ञवालीले चितवन शाखालाई नेपालको हस्पिटालिटी नक्सामा अर्को महत्वपूर्ण माइलस्टोनका रूपमा रहेको बताए ।

उनले भने, 'चितवन नेपालको मध्य भाग हो- देशभरका आन्तरिक तथा बाह्य पर्यटकका लागि प्रमुख गन्तव्य । चितवन राष्ट्रिय निकुञ्ज, देवघाटधाम, मौलाकालीकाजस्ता धार्मिक तथा प्राकृतिक आकर्षणका बीच पौवाको उपस्थितिले यस क्षेत्रलाई अझ पहिचान दिन सहयोग गर्नेछ ।'

नेपालमा विदेशी शैलीका होटलहरू हावी भइरहेका बेला ‘होटल पौवा’ले नेपाली सत्कार, नेपाली संस्कार र नेपाली स्वादको अनुभूति दिने उद्देश्यसहित हस्पिटालिटी क्षेत्रमा नयाँ परिभाषा ल्याएको ज्ञवालीले बताए ।

रुपन्देहीको सालझण्डीबाट शुरू भएको पौवाको यात्रा आज चितवनमा १६औं शाखासम्म पुगेको छ ।

यसअघि पौवाका शाखाहरू भैरहवा, बुटवल, गोरुसिङ्गे, भालुवाङ, लमही, घोराही, जुम्ला, तानसेन, रेसुङ्गा, धनगढी, पोखरा, काठमाडौं, मुलकोट र कालिञ्चोकमा सञ्चालनमा छन् ।

हाल नेपालगञ्जमा पाँचतारे होटलको मुख्य आवास भवन निर्माणाधीन अवस्थामा रहेको छ भने व्याङक्वेट र रेस्टुरेन्टबाट सेवा प्रवाह भइरहेको छ ।

पाल्पाको झिंगामारामा पाँचतारे रिसोर्ट निर्माणका लागि ल्याण्ड स्केपिङको काम भइरहेको छ ।

स्थानीय खाना बनाउन पोख्त महिला सेफहरूबाट नेपालगन्ज र भैरहवामा दाल भात, तरकारी अचार समेटिएको नेपाली खाना 'भातभान्छा'को प्रबर्द्धन शुरू गरिएको छ ।

भातभान्छालाई महिला कर्मचारीहरूले मात्रै सम्हाल्दै आएका छन् । 'नेपाली खानालाई स्तरीय रेस्टुरेन्टमा पस्किने तयारीका साथ पौवाले आफ्नो छुट्टै ब्रान्ड भातभान्छा शुरू गरेको हो । ६ महिनाका बीच नेपालगन्ज र भैरहवाबाट शुरू गरेको यो ब्रान्डलाई निरन्तर विस्तारको योजना रहेको छ,' उपाध्यक्ष न्यौपानेले भने ।

देशभर १ हजारभन्दा बढी रोजगारी सिर्जना गर्दै आएको होटल पौवामा २५० भन्दा बढी लगानीकर्ता संलग्न छन् ।

विशेषतः यहाँका कर्मचारीहरूलाई पनि लगानीकर्ता बन्ने अवसर दिइएको छ, जसले पौवाको ‘साझा स्वामित्व र साझा सफलता’को भावना झल्काउँछ ।

विश्वशान्तिका दूत गौतम बुद्धको जन्मस्थल लुम्बिनीबाट शुरू भएको पौवाको यात्रा अब देशव्यापी अभियानमा रूपान्तरण भइसकेको छ ।

हस्पिटालिटी र स्वादको नेपाली पहिचानलाई विश्वमाझ पुर्‍याउने ‘मिसन १०० पौवा होटल’ अभियानले चितवनबाट नयाँ अध्याय शुरू गरेको हो ।