२९ असार २०८३, सोमबार
नेपाल प्रिमियर लिग (एनपीएल) क्रिकेट प्रतियोगिताको दोस्रो संस्करणको उद्घाटन खेलमा सोमबार साबिक विजेता जनकपुर बोल्ट्सले काठमाण्डू गोर्खाजलाई जितका लागि एक सय ३१ रनको लक्ष्य दिएको छ ।
कीर्तिपुरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको जनकपुर बोल्ट्सले निर्धारित २० ओभरमा ६ विकेट गुमाएर एक सय ३० रन बनायो । पालीको गतिलो शुरूआत गरे पनि पाँचौं ओभरमा लगातार दुई विकेट गुमाएपछि जनकपुर बोल्ट्स दबाबमा परेको थियो ।
जनकपुरका लागि ओपनर आसिफ शेखले अर्धशतकीय पाली खेले । उनले टोलीका लागि ५४रनको योगदान गरे । यसक्रममा उनले केवल ४१ बलको सामना गरी एक छक्का र ६ चौका हिर्काए । एनपीएलको दोस्रो संस्करणमा छक्का प्रहार गर्ने उनी पहिलो ब्याट्सम्यान पनि बने ।
त्यसअघि, उनले ३७ बलमा आफ्नो अर्धशतक पूरा गरेका थिए । उनी एनपीएलको दोस्रो संस्करणमा छक्का प्रहार गर्ने पहिलो खेलाडी पनि बनेका छन् । आसिफ शेख र लाहिरु मिलनथाले ओपनि विकेटका लागि ३४ रनको साझेदारी गरेका थिए ।
मिलनथा भने १२ बलमा एक चौकाको मद्दतले सात रनमात्र बनाउन सके । उनी एनपीएलको दोस्रो संस्करणमा चौका प्रहार गर्ने पहिलो ब्याट्सम्यान पनि बने । पाँचौं ओभरमा मिलनथा र अनिल साह (शून्य रन) को विकेट गुमाएरपछि जनकपुर बोल्ट्स दबाबमा परेको थियो ।
जनकपुरका लागि माथिल्ला पाँचमध्ये एक ब्याट्सम्यानले मात्र दोहोरो अंकमा रन बनाउन सके । छैटौँ नम्बरमा क्रिज समाल्न आएका मायान यादवले टोलीको खातामा महत्वपूर्ण अविजित ३४ रनको योगदान गरे । उनले २९ बलको सामना गरी एक छक्का र दुई चौका पनि हिर्काए ।
लाहिरु समाराकुनले पनि टोलीको खातामा २२ रन थपे । उनले २१ बलमा दुई छक्का हिर्काए । काठमाण्डू गोर्खाजका बलर मिलिन्द कुमारले तीन विकेट लिए । उनले चार ओभरमा केवल १५ रन खर्चिए । करण केसी, साहद आलम र सन्तोष यादवले पनि एक/एक विकेट हात पारे ।
त्यसअघि, प्रधानमन्त्री सुशीला कार्कीले प्रतियोगिताको उद्घाटन गरेकी थिइन् ।
प्रतियोगितामा जनकपुर बोल्ट्स, सुदूरपश्चिम रोयल्स, काठमाण्डू गोर्खाज, विराटनगर किङ्स, चितवन राइनोज, लुम्बिनी लायन्स, पोखरा एभेन्जर्स र कर्णाली याक्स गरी आठ टोली सहभागी छन् ।
