अख्तियार दुरुपयोग अनुसन्धान आयोगले बाँके जिल्ला अदालतमा कार्यरत नायब सुब्बा (नासु) रामप्रसाद धमलाविरुद्ध भ्रष्टाचार मुद्दा दायर गरेको छ ।

मिसिल अभिलेख रहेको फाँट 'क'मा कार्यरत नासु धमलाले फैसलाको प्रतिलिपि दिने प्रयोजनार्थ सेवाग्राहीसँग घुस बापत १२ हजार रुपैयाँ लिएको आरोपमा उनीविरुद्ध मंगलबार विशेष अदालतमा मुद्दा दायर गरिएको आयोगले जनाएको छ ।

आयोगका प्रवक्ता राजेन्द्रकुमार पौडेलका अनुसार आयोगको बुटवलको सम्पर्क कार्यालय नेपालगञ्जबाट खटिएको टोलीले धमलालाई सेवाग्राहीसँग लिएको घुस रकमसहित पक्राउ गरेको थियो ।

अनुसन्धानका क्रममा उनले बैनाबट्टा लेनदेन मुद्दाको अदालतबाट भएको फैसलाको प्रतिलिपि उपलब्ध गराई दिने प्रयोजनका लागि विभिन्न बहानामा घुस लिएको पुष्टि भएको थियो ।

आयोगले उनीविरुद्ध १२ हजार रुपैयाँ बिगो कायम गरी कैद र बिगो बमोजिम जरिवानाको मागदाबी गरेको छ ।