१६ असार २०८३, मंगलबार
काठमाडौंको ठमेलस्थित एक होटलको लिज सम्झौता, पुनर्निर्माणमा गरिएको लगानी र होटलको कब्जासम्बन्धी विवाद काठमाडौं जिल्ला अदालतमा पुगेको छ ।
दुवै पक्षको प्रारम्भिक बहसपछि अदालतले विवादको अन्तिम टुंगो नलाग्दासम्म होटलको वर्तमान अवस्था (यथास्थिति) कायम राख्न अन्तरिम आदेश जारी गरेको छ ।
अदालतमा दर्ता गरिएको उजुरीअनुसार काठमाडौं महानगरपालिका–२६, ठमेलस्थित साततले ‘होटल ढाका एक्सप्रेस’ बङ्गलादेशी नागरिक ईस्थामुल हक सामेलको स्वामित्वमा रहेको छ ।
उक्त होटल अर्का बङ्गलादेशी नागरिक रिपन मेहमुदले सन् २०२४, मे १६ मा आवासीय होटल सञ्चालन गर्ने उद्देश्यले लिजमा लिएका थिए ।
लिज सम्झौताअनुसार रिपनले २५ लाख रूपैयाँ सुरक्षा धरौटी बुझाएका थिए भने मासिक ३ लाख ५० हजार रूपैयाँ भाडा तिर्ने सहमति भएको उजुरीमा उल्लेख छ ।
उजुरीमा भवन मालिकसँगको मौखिक तथा लिखित सहमतिका आधारमा रिपनले होटलको पुनर्निर्माण तथा मर्मतमा करिब ८९ लाख रूपैयाँ लगानी गरेको दाबी गरिएको छ । उक्त रकमबाट होटलको लबी मर्मत, छैटौं र सातौं तलामा आंशिक रूपमा बनेका १० कोठाको निर्माण सम्पन्न, सजावट, फर्निचर जडान तथा बाथरूम निर्माणलगायतका काम गरिएको उल्लेख छ । भवनमा यसअघि रहेका २१ कोठा भने यथावत् रहेको जनाइएको छ ।
पुनर्निर्माण तथा मर्मतमा भएको लगानी रकम पहिल्यै बुझाइएको २५ लाख रूपैयाँ धरौटीमा थपिने सहमति भए पनि काम सम्पन्न भएपछि र पहिलो एक वर्षे लिज अवधि समाप्त हुँदा समेत उक्त रकम समावेश नगरिएको आरोप उजुरीमा लगाइएको छ ।
उजुरीअनुसार त्यसपछि भवन मालिकले सम्झौता र प्रचलित कानूनविपरीत ६ महिनामै मासिक भाडा ३ लाख ५० हजारबाट बढाएर ४ लाख रूपैयाँ पुर्याएका थिए । एक वर्षपछि पुन: मासिक ४ लाख २५ हजार रूपैयाँ कायम गर्दै थप दुई वर्षका लागि लिज नवीकरण गरिएको दाबी गरिएको छ ।
नवीकरण गरिएको सम्झौतामा पुनर्निर्माण तथा मर्मतमा भएको लगानी रकम उल्लेख गर्ने खण्ड खाली राखिएको र उक्त रकम स्पष्ट रूपमा समावेश गर्न आग्रह गर्दा भवन मालिकले थप ३५ लाख रूपैयाँ अग्रिम धरौटी माग गरेको आरोप पनि उजुरीमा छ ।
थप धरौटी रकम तिर्न अस्वीकार गरेपछि सम्झौताका साक्षी मिहिर चौधरीमार्फत २०२६, मे ३१ भित्र होटल खाली गर्नुपर्ने भन्दै मौखिक तथा ह्वाट्सएपमार्फत सूचना पठाइएको थियो । २०२७ जुनसम्म लिज अवधि कायम रहे पनि होटल खाली गर्न दबाब दिइएको र बद्री प्रसाद पाण्डेको नाम प्रयोग गरी धम्की दिइएको आरोप पनि उजुरीमा उल्लेख गरिएको छ ।
उजुरीमा रिपन मेहमुदकी बहिनी तथा व्यावसायिक साझेदार खातुन (एज) जन्नत र महबुब हसनमाथि होटलको लबीमा केही व्यक्तिको समूहले कुटपिट गरेको आरोपसमेत लगाइएको छ । घटनामा उनीहरू घाइते भएको र राष्ट्रिय ट्रमा सेन्टरमा उपचार गराइएको थियो । घटनाबारे सोह्रखुट्टे प्रहरी वृत्तमा र जिल्ला प्रहरी परिसर काठमाडौंको शान्ति तथा सुरक्षा शाखामा सुरक्षा माग गर्दै निवेदन दर्ता गरिएको पनि उजुरीमा उल्लेख छ ।
त्यसपछि रिपन मेहमुद पक्षले वैध लिजअन्तर्गतको होटलको कब्जा संरक्षण, पुनर्निर्माण तथा मर्मतमा गरिएको लगानीको कानूनी समाधान र न्यायको माग गर्दै काठमाडौं जिल्ला अदालतमा मुद्दा दायर गरेका हुन् ।
दुवै पक्षका कानून व्यवसायीको प्रारम्भिक बहसपछि अदालतले विवादको अन्तिम किनारा नलाग्दासम्म होटलको यथास्थिति कायम राख्न अन्तरिम आदेश जारी गरेको छ ।
यता, भवन मालिक एहतेशामुल हक सामेलको यस विषयमा आधिकारिक प्रतिक्रिया सार्वजनिक भएको छैन । अदालतमा मुद्दा विचाराधीन रहेकाले विवादको अन्तिम कानूनी निष्कर्ष आउन बाँकी छ ।
पीडतको आरोप : मिहिर चौधरीको मुख्य योजना
होटल लिजमा लिएर चलाइरहेका बङ्गलादेशी नागरिक रिपन मेहमुदले यो सबै घटनाको मुख्य योजनाकार मिहिर चौधरी रहेको आरोप लगाएका छन् ।
‘यो सबै ठगी धन्दाको मुख्य योजनाकार मिहिर चौधरी हुन्, जसको मुख्य उद्देश्य नै मानिसहरूलाई ठग्नु हो । मिहिर चौधरीले हामीलाई नियमित रूपमा गुण्डाहरू पठाएर धम्की दिने र हाम्रो क्षति पुर्याउने विभिन्न प्रयास गरिरहेका छन्’, उनले भने, ‘उनीहरूको काम नै हरेक ६ महिनामा नयाँ लगानीकर्ता ल्याएर लगानी गराउने र पछि विभिन्न झमेलामा फसाएर खाली हात फिर्ता पठाउने हो ।’
आफूहरूसँग वैध सम्झौता कायम रहँदा–रहँदै पनि उनीहरूले अर्को व्यक्तिबाट एड्भान्स लिएका रिपनले बताए । आफूहरूलाई दबाब दिएर निकाल्ने प्रयास भइरहेको उनको भनाइ छ ।
‘सम्मानित अदालतको फैसला आइसकेपछि पनि उनीहरूले अदालतको अवहेलना गर्दै हामीलाई विभिन्न किसिमले मानसिक तथा शारीरिक यातना दिएर जबर्जस्ती निकाल्ने प्रयास गरिरहेका छन्’, रिपनले भने ।
