जेनजी आन्दोलनका क्रममा प्रहरीको पेस्तोल लुटेर सोही पेस्तोल प्रयोग गरी ‘फूड डेलिभरी ब्वाइ’लाई लुटपाट गरेको आरोपमा प्रहरीले दुई जनालाई पक्राउ गरेको छ ।

पक्राउ पर्नेमा मकवानपुर घर भएर बागबजार बस्ने निकेश बिक र सुरज बिक छन् । उनीहरूले यही मंसिर ५ गते बागबजारमा भोज डिलको खानेकुरा डेरिभरी गर्ने निरज चौधरीलाई पेस्तोल देखाएर नगद र जिन्सी सामान लुटपाट गरेका थिए । चौधरीले प्रहरीमा उजुरी गरेपछि बिकद्वयको खोजी भएको थियो ।

काठमाडौं उपत्यका अपराध अनुसन्धान कार्यालयका प्रवक्ता एवं प्रहरी उपरीक्षक (एसपी) काजीकुमार आचार्यका अनुसार बिकद्वयले चौधरीलाई देखाएको पेस्तोल प्रहरीले उनीहरूबाट बरामद गरेको छ । उनीहरूबाट दुई थान पेस्तोल र एक थान म्याग्जिन बरामद गरेको जानकारी आचार्यले दिए ।

प्रहरी अनुसन्धानका क्रममा पक्राउमध्येका निकेश बिक २०८१ माघ ११ मा केन्द्रीय अनुसन्धान ब्यूरो (सीआईबी)मा दर्ता भएको भएको ठगी, आपराधिक विश्वासघात तथा आपराधिक लाभ (एक्टर्सन) मुद्दामा फरार थिए । त्यस्तै, २०८१ भदौ ५ गते इलाका प्रहरी कार्यालय गौशालामार्फत चलेको चोरी मुद्दामा समेत उनी फरार रहेको प्रहरी अनुसन्धानबाट खुलेको छ ।

प्रहरीले बिकद्वयसँगै बाग्लुङस्थित ढोरपाटन नगरपालिका– ३ घर भएर काठमाडौं भृकुटीमण्डप बस्ने बालकृष्ण गैरेलाई पनि पक्राउ गरेको छ ।

एसपी आचार्यका अनुसार पक्राउ परेका तीनै जनालाई हातहतियार तथा खरखजाना मुद्दामा कारबाहीका लागि जिल्ला प्रहरी परिसर काठमाडौं बुझाइएको छ ।