२८ जेठ २०८३, बिहीबार
जापानको होक्काइडो क्षेत्रमा हालै भएको भालु आक्रमणको घटनाले सर्वसाधारणलाई स्तब्ध बनाएको छ ।
उक्त आक्रमणमा ज्यान गुमाएका एक पर्वतारोहीका अन्तिम क्षणहरू उनको जीपीएस घडीले रेकर्ड गरेको पाइएको छ ।
स्याटेलाइटसँग जोडिएको उक्त घडीले उनको यात्रा मार्ग र मुटुको धड्कन रेकर्ड गर्दै आएको थियो । घटनास्थलबाट बरामद गरिएको घडीको डाटाका आधारमा जापानको पुरानो पत्रिका असाही शिम्बुनले ती अन्तिम क्षणको मार्मिक विवरण सार्वजनिक गरेको छ ।
पत्रिकाका अनुसार ती पर्वतारोहीमाथि १४ अगस्टमा भालुले आक्रमण गरी मारेको थियो । डाटाबाट बिहान करिब ११ बजे उनी ट्रेलमा रहेको देखिन्छ । त्यसपछि अचानक ट्रेल छाडेर जंगलतर्फ ओरालो झरेको र झाडीबीच उनका कदम गोल–गोल घुमेको देखिएको छ, जसले डर र संघर्षको अवस्था स्पष्ट झल्काउँछ ।
घडीले त्यही स्थानमा उनको मुटुको धड्कन बन्द भएको रेकर्ड गरेको छ, अर्थात् त्यही ठाउँ उनको मृत्युस्थल बनेको देखिन्छ । केही घण्टापछि घडीले पुनः केही सय मिटरको गतिविधि रेकर्ड गरेको थियो । यसले भालु पुनः फर्किएर मृतकको शव त्यहाँबाट तानेर लगेको संकेत गर्छ ।
१५ अगस्टमा स्थानीय अधिकारीहरूले एक भालु आफ्ना दुई बच्चासहित मृतकको शव मुखमा च्यापेर लैजाँदै गरेको देखेका थिए । पछि उक्त भालु र उसका दुई बच्चालाई पनि मारिएको थियो ।
जापानी अखबारका अनुसार मृतकको शव परिवारलाई बुझाउँदा उनका बाबुआमालाई केवल अनुहार मात्र हेर्न अनुरोध गरिएको थियो, किनकि शरीरका अन्य भागमा अत्यन्त गहिरा चोट थिए ।
जापान टुडेका अनुसार, यस वर्ष जापानमा भालु आक्रमणका घटना रेकर्ड स्तरमा पुगेका छन् । केवल होक्काइडोमै अहिलेसम्म १३ जनाको मृत्यु भइसकेको छ भने २०० भन्दा बढी घाइते भएका छन् ।
यी घटनाहरू मुख्यतया ग्रामीण क्षेत्रमा भइरहेका छन्, जहाँ भालुको बासस्थान र मानव गतिविधिबीचको टकराव बढ्दै गएको छ ।
