०६ असार २०८३, शनिबार
बालिकाहरूलाई ललाईफकाई यौनजन्य क्रियाकलापमा संलग्न गराएको आरोपमा प्रहरीले दुई जनालाई काठमाडौँबाट पक्राउ गरेको छ । पक्राउ पर्नेहरूमा काभ्रेपलाञ्चोक घर भई ललितपुर बस्ने २६ वर्षीय राजन तामाङ र दोलखा घर भई काठमाडौँको लोलाङ बस्ने ३४ वर्षीय लक्ष्मण तामाङ रहेका छन् ।
जिल्ला प्रहरी परिसर काठमाडौँका अनुसार, गत पुस १२ गते राति साढे १२ बजे ठमेलस्थित सञ्चयकोष चोक नजिकै सडक खण्डमा बा २ ज २३२७ नम्बरको ट्याक्सीलाई शङ्कास्पद अवस्थामा फेला पारिएको थियो । प्रहरीले जाँच गर्दा उक्त ट्याक्सीको पछाडिको सिटमा दुई जना बालिकाहरूलाई राखिएको फेला पारेपछि उनीहरूको उद्धार गरेको थियो ।
अनुसन्धानका क्रममा पक्राउ परेका राजन र लक्ष्मणले विभिन्न व्यक्तिहरूसँग मोबाइलमार्फत महिला तथा बालिकाहरूको फोटो आदानप्रदान गर्ने र रकमको बार्गेनिङ गरी उनीहरूलाई यौनजन्य कार्यमा लगाउने गरेको खुलेको छ । प्रहरीले बा २ ज २३२७ नम्बरको ट्याक्सी र रेडमी तथा सामसुङ कम्पनीका दुईवटा मोबाइल सेट समेत बरामद गरेको छ ।
पक्राउ परेकामध्ये लक्ष्मण तामाङको पृष्ठभूमि थप आपराधिक देखिएको छ । उनी विरुद्ध वि.सं. २०७३ साल असोज ३० गते जिल्ला प्रहरी कार्यालय दोलखामा कर्तव्य ज्यान सम्बन्धी मुद्दा दर्ता भएको प्रहरीले जनाएको छ ।
जिल्ला प्रहरी परिसर काठमाडौँका प्रवक्ता एवं प्रहरी उपरीक्षक पवन कुमार भट्टराईले पक्राउ परेका दुवै जनामाथि ‘अभद्र व्यवहार’ र ‘मानव बेचबिखन तथा ओसारपसार’ कसूरमा थप अनुसन्धान भइरहेको बताए ।
