पाँचौँ तथा अन्तिम एसेस टेस्ट क्रिकेटमा पनि घरेलु टोली अस्ट्रेलियाले इङ्ल्यान्डलाई पाँच विकेटले हराएको छ । यससँगै अस्ट्रेलियाले पाँच खेलको शृंखला ४–१ ले आफ्नो पक्षमा पारेको हो ।

पहिलो र दोस्रो टेस्टमा अस्ट्रेलिया आठ विकेटले विजयी भएको थियो । तेस्रो टेस्टमा अस्ट्रेलिया ८२ रनले विजयी भएको थियो । चौथो टेस्ट इङ्ल्यान्डले चार विकेटले जितेको थियो ।

सिड्नी क्रिकेट ग्राउन्डमा खेलिएको पाँचौँ टेस्टको अन्तिम दिन बिहीबार अस्ट्रेलियाले एक सय ६० रनको लक्ष्य पाँच विकेट गुमाएर पूरा गरेको हो ।

दोस्रो पालीमा अस्ट्रेलियाका लागि मार्नस लाबुशेनले ३७ रन बनाए । ओपनर ज्याक वेदरल्डले ३४ रन जोडे । अर्का ओपनर ट्राभिस हेड २९ रन बनाउँदै आउट भए ।

क्यामरन ग्रिनले अविजित २२ र विकेटकिपर ब्याट्सम्यान एलेक्स केरीले अविजित १६ रन बनाए । कप्तान स्टिभन स्मिथ भने १२ रन बनाउँदै आउट भएका थिए ।

दोस्रो पालीमा इङ्ल्यान्डका बलर जोस टङले तीन र विल ज्याक्सले एक विकेट लिए । त्यसअघि इङ्ल्यान्ड आफ्नो दोस्रो पालीमा तीन सय ४२ रन बनाउँदै अलआउट भएको थियो ।

इङ्ल्यान्डका लागि दोस्रो पालीमा ज्याक बेथलले एक सय ५४ रनको योगदान गरेका थिए । २२ वर्षीय बायाँहाते ब्याट्सम्यान बेथलले टेस्ट क्रिकेटमा बनाएको यो पहिलो शतक हो ।

ह्यारी ब्रुकले पनि ४२ रन जोडे । दोस्रो पालीमा अस्ट्रेलियाका बलर बेउ वेबस्टर र मिचेल स्टार्कले तीन–तीन तथा स्कट बोल्यान्डले दुई विकेट लिए ।

त्यसअघि, अस्ट्रेलियन टोलीले आफ्नो पहिलो पालीमा पाँच सय ६७ रनको विशाल योगफल तयार पारेको थियो । पहिलो पालीमा अस्ट्रेलियाका लागि ट्राभिस हेडले एक सय ६३ रन बनाए ।

३२ वर्षीय अनुभवी बायाँहाते ब्याट्सम्यान हेडले टेस्ट क्रिकेटमा बनाएको यो १२औँ शतक हो । कप्तान स्मिथले पनि टोलीका लागि एक सय ३८ रनको योगदान गरे ।

स्मिथले एसेस टेस्टको ९६ वर्ष पुरानो कीर्तिमान पनि तोडे । स्मिथले टेस्ट क्रिकेटमा बनाएको यो ३७औँ शतक हो । एसेस टेस्टमा भने उनले बनाएको यो १३औँ शतक हो ।

योसँगै उनी एसेस शृंखलाको इतिहासमा ९६ वर्ष पुरानो कीर्तिमान तोड्दै सर्वाधिक शतक प्रहार गर्ने ब्याट्सम्यानको सूचिमा दोस्रो स्थानमा उक्लिएका हुन् ।

उनले इङ्ल्यान्डका पूर्वब्याट्सम्यान ज्याक हब्सको कीर्तिमान तोडे । ज्याकले एसेसमा १२ शतक प्रहार गरेका थिए । उनी सर्वाधिक शतक प्रहार गर्ने ब्याट्सम्यानको सूचिमा तेस्रो नम्बरमा झरेका छन् ।

एसेस शृंखलामा सर्वाधिक शतक बनाउने ब्याट्सम्यान भने सर डान ब्राडम्यान हुन् । उनले एसेस शृंखलामा १९ वटा शतक प्रहार गरेर इतिहास रचेका छन् ।

परम्परागत एसेस क्रिकेट शृंखलामा सर्वाधिक रन बनाउने सूचीमा पनि ब्राडम्यान कुल पाँच हजार २८ रनसहित पहिलो स्थानमा छन् ।

यो सूचीमा पनि स्टिभ स्मिथ तीन हजार ६ सय ८२ रनसहित दोस्रो स्थानमा र ज्याक हब्स तीन हजार ६ सय ३६ रनसहित तेस्रो स्थानमा आसिन छन् ।

स्टिभ स्मिथले भारतका महान क्रिकेटर सचिन तेन्दुल्करलाई पनि पछि पारेका छन् । स्मिथले सबैभन्दा कम पालीमा ३७औँ टेस्ट शतक पूरा गर्ने तेन्दुल्करको कीर्तिमान तोडेका हुन् ।

स्मिथले दुई सय १९ र तेन्दुल्करले दुई सय २० पालीमा ३७औँ टेस्ट शतक पूरा गरेका हुन् । सबैभन्दा कम पालीमा ३७औँ टेस्ट शतक पूरा गर्ने खेलाडी भने अस्ट्रेलियाकै पूर्वकप्तान रिकी पोन्टिङ हुन् । उनले केवल दुई सय १२ पालीमा ३७औँ टेस्ट शतक पूरा गरेका थिए ।

पहिलो पालीमा अस्ट्रेलियाका लागि बेउ वेबस्टरले पनि अविजित ७१ रनको योगदान गरे । इङ्ल्यान्डका बलर ब्राइडन कार्स र जोस टङले तीन–तीन र बेन स्टोक्सले दुई विकेट लिए ।

त्यसअघि, पाँचौँ टेस्टमा टस जिती ब्याटिङको निर्णय लिएको इङ्ल्यान्डले आफ्नो पहिलो पालीमा तीन सय ८४ रन बनाएको थियो । जो रुटले एक सय ६० रन बनाए ।

३५ वर्षीय अनुभवी ब्याट्सम्यान रुटले टेस्ट क्रिकेटमा बनाएको यो ४१औँ शतक हो । टोलीको खातामा ह्यारी ब्रुकले ८४ र विकेटकिपर ब्याट्सम्यान जामी स्मिथले ४६ रन थपे ।

पहिलो पालीमा अस्ट्रेलियाका बलर माइकल नेसर एक्लैले चार विकेट लिए । मिचेल स्टार्क र स्कट बोल्यान्डले पनि दुई–दुई विकेट हात पारे ।

पाँचौँ टेस्टमा ट्राभिस हेड प्लेयर अफ दि म्याच घोषित भए । अस्ट्रेलियाकै मिचेल स्टार्कले प्लेयर अफ दि सिरिजको पुरस्कार पाए ।