भेनेजुएलाकी विपक्षी नेतृ मारिया कोरिना माचाडोले ह्वाइट हाउसमा भएको भेटका क्रममा अमेरिकी राष्ट्रपति डोनाल्ड ट्रम्पलाई नोबेल शान्ति पुरस्कारसँगै प्रदान गरिने स्वर्ण पदक हस्तान्तरण गरेकी छन्। भेनेजुएलाको राजनीतिक भविष्यमा ट्रम्पको प्रभाव पार्ने प्रयासस्वरूप माचाडोले उक्त पदक ट्रम्पलाई दिएकी हुन्।

ह्वाइट हाउसका एक अधिकारीले ट्रम्पले उक्त पदक आफ्नै साथमा राख्न चाहेको पुष्टि गरेको रोयटर्सले जनाएको छ । सञ्जालमार्फत् ट्रम्पले पदक स्वीकार गरेको सार्वजनिक गर्दै लेखेका छन्, 'मारियाले मैले गरेको कामको कदरस्वरूप मलाई उनको नोबेल शान्ति पुरस्कार प्रदान गरिन्। यो पारस्परिक सम्मानको अद्भुत इशारा हो। धन्यवाद, मारिया!'

भेटपछि माचाडोले बैठकलाई उत्कृष्ट भन्दै पदक हस्तान्तरण भेनेजुएलाका जनताको स्वतन्त्रता र लोकतन्त्रप्रतिको आफ्नो प्रतिबद्धताको प्रतीक भएको बताइन्। यद्यपि, उनले ट्रम्पलाई दिएको पदक केवल सम्मानको प्रतीक मात्र भएको र नोबेल शान्ति पुरस्कार औपचारिक रूपमा आफ्नो नाममै रहने स्पष्ट पारिन्। नर्वेजियन नोबेल संस्थानले पुरस्कार हस्तान्तरण, बाँडफाँड वा खारेज गर्न नसकिने नियम रहेको जनाइसकेको छ।

माचाडोको यो कदम ट्रम्पले उनलाई पदच्युत राष्ट्रपति निकोलस मादुरोलाई प्रतिस्थापन गर्दै भेनेजुएलाको नेताको रूपमा स्थापित गर्ने विचारलाई अस्वीकार गरेपछि आएको हो । ट्रम्पले गत महिना माचाडोलाई नोबेल शान्ति पुरस्कार प्रदान गर्नुअघि नै आफू पनि उक्त पुरस्कारका लागि योग्य रहेको दाबी गर्दै खुलेर अभियान चलाएका थिए। आफूलाई पुरस्कार नदिइएको भन्दै उनले त्यसबेला असन्तुष्टि समेत व्यक्त गरेका थिए।

ट्रम्पले लामो समयदेखि नोबेल शान्ति पुरस्कारप्रति रुचि देखाउँदै आएका छन् र आफ्ना विभिन्न कूटनीतिक प्रयास तथा अन्तर्राष्ट्रिय पहललाई पुरस्कारसँग जोड्दै आएका छन्।

ट्रम्प र माचाडोबीचको खाजा बैठक करिब एक घण्टाभन्दा अलि बढी समय चलेको थियो, जुन उनीहरूबीचको पहिलो प्रत्यक्ष भेट थियो। त्यसपछि माचाडोले क्यापिटल हिलमा रिपब्लिकन र डेमोक्र्याटिक दुवै दलका दर्जनभन्दा बढी सिनेटरहरूसँग भेटघाट गरिन्, जहाँ उनले अपेक्षाकृत उत्साहित समर्थन पाएकी थिइन्।