झापा-५  बाट बालेन्द्र शाह (बालेन)ले मनोनयन दर्ता गरेका छन् । मंगलबार बिहान दमक पुगेर उनले मनोनयन दर्ता गराएका हुन् । 

शाहको प्रस्तावकमा भेषराज भट्टराई र समर्थक भूमिनन्द बराल रहेका छन् । बाजा गाजासहित दमक चोकबाट मुख्य निर्वाचन अधिकृतको कार्यालय आएका उनले मनोनयन दर्ता गराएका हुन् ।

झापा-५ मा नेकपा एमालेका अध्यक्ष केपी शर्मा ओलीले पनि केही बेरपछि मनोनयन दर्ता गराउँदै छन् । 

फागुन २१ गते हुने प्रतिनिधिसभा सदस्य निर्वाचनअन्तर्गत प्रत्यक्षतर्फ आज देशभर उम्मेदवारी दर्ता हुँदैछ । निर्वाचन आयोगका देशभरका १ सय ६५ वटै निर्वाचन क्षेत्रका निर्वाचन कार्यालयमा मनोनयन दर्ताको काम भैरहेको छ । 

आयोगले प्रमुख राजनीतिक दल तथा उम्मेदवारलाई उम्मेदवारी दर्ताको समयसमेत निर्धारण गरेको छ । भीडभाड कम गराउने र उम्मेदवारी दर्ता सहज बनाउने उद्देश्यले समय निर्धारण गरिएको आयोगले जनाएको छ । 

कूल २७५ सदस्यीय प्रतिनिधिसभामा समानुपातिक निर्वाचन प्रणालीमार्फत् ११० जना चयन हुनेछन् भने प्रत्यक्ष प्रणालीमार्फत् १६५ निर्वाचित हुने व्यवस्था छ ।