२७ असार २०८३, शनिबार
विभागीय टोली त्रिभुवन आर्मी क्लब पोखरामा जारी छैटौं एनसेल टाइगर कप महिला तथा पुरुष भलिबल प्रतियोगिताको महिलातर्फको उपाधि होडबाट बाहिरिएको छ ।
महिलातर्फ लगातार तेस्रो हारसँगै आर्मी क्लब उपाधि होडबाट बाहिरिएको हो । प्रतियोगिताको चौथो दिन सोमबार आर्मी क्लबलाई सशस्त्र प्रहरी बलको एपीएफ क्लबले ३–० सेटले हरायो ।
पोखरा रंगशालाको भलिबल कोर्टमा खेलिएको दुई विभागीय टोलीबीचको खेलमा एपीएफ क्लबले आर्मी क्लबलाई २५–११, २५–१८ र २५–१९ अंकले हरायो ।
पहिलो खेलमा टिप टप न्यु डायमण्ड स्पोर्टस क्लबले आर्मी क्लबलाई २५–१३, २६–१६ र २५–८ अंकले पराजित गरेको थियो ।
आर्मी क्लबको टोली आफ्नो दोस्रो खेलमा नेपाल पुलिस क्लबसँग २५–१६, १७–२५, २२–२५ र १३–२५ अंकले पराजित भएको थियो । आर्मी क्लबले अन्तिम खेल मंगलबार थाइल्यान्ड क्विन्ससँग खेल्नेछ ।
प्रतियोगिताको महिलातर्फ पाँच र पुरुषतर्फ ६ टोलीको सहभागिता रहेको छ । महिलातर्फ न्यु डायमण्ड, आर्मी, नेपाल पुलिस क्लब, एपीएफ क्लब र थाइल्याण्ड क्विन्स सहभागी छन् ।
पुरुषतर्फ नेपाल पुलिस क्लब, त्रिभुवन आर्मी क्लब, एपीएफ क्लब, गण्डकी प्रदेश भलिबल संघ, पर्वत जिल्ला भलिबल संघ र माल्दिभ्सको टोली सहभागी छन् ।
