१३ असार २०८३, शनिबार
मानवअधिकार समूह तथा अभियन्ताहरूले चीनको सिचुआन प्रान्तमा एक वरिष्ठ अधिकारीमाथि लागेको कथित भ्रष्टाचार प्रकरण उजागर गरेपछि दुई जना खोज पत्रकारलाई हिरासतमा लिइएकोप्रति गम्भीर चिन्ता व्यक्त गरेका छन् ।
अधिकार समूहका अनुसार स्वतन्त्र पत्रकार लियू हू र वू यिङजियाओले खोजमूलक प्रतिवेदन प्रकाशित गरेपछि आइतबार प्रहरीले हिरासतमा लिइएका हुन् ।
आलोचकहरूले चीनमा लामो समयदेखि सञ्चारमाध्यममाथि हुने दमनका घटनाप्रति चिन्ता जनाउँदै आएका छन् । यसअघि पनि चीनमा पत्रकारहरूले मुद्दा र कानुनी कारबाहीको सामना गर्नुपरेको थियो ।
चेङ्दु प्रहरीका अनुसार सोमबार जारी वक्तव्यमा लियू र वू थर भएका दुई व्यक्ति ‘झुटा आरोप लगाएको’ तथा ‘अवैध व्यावसायिक गतिविधि’ सम्बन्धी मुद्दामा अनुसन्धानको दायरामा छन् । हिरासतमा परेकामध्ये एकको उमेर ५० वर्ष र अर्काको ३४ वर्ष रहेको बताइएको छ ।
यी गिरफ्तारीबारे चीन सरकारको तर्फबाट अहिलेसम्म कुनै आधिकारिक प्रतिक्रिया आएको छैन ।
लियू चीनका परिचित खोजी पत्रकार हुन् । उनलाई यसअघि सन् २०१३ मा पनि पक्राउ गरिएको थियो । त्यतिबेला एक उच्चपदस्थ अधिकारीमाथि भ्रष्टाचारको आरोप लगाएपछि मानहानिको शङ्कामा उनलाई गिरफ्तार गरिएको थियो ।
तर सन् २०१४ मा रिहा भएपछि लियूले आफ्नो खोजी पत्रकारिता निरन्तर जारी राख्दै सामाजिक सञ्जालमार्फत आफ्ना प्रतिवेदन प्रकाशित गर्दै आएका थिए ।
