१३ असार २०८३, शनिबार
मेक्सिकोका सबैभन्दा खोजिएका लागूऔषध तस्कर तथा 'जालिस्को न्यु जेनेरेसन कार्टेल' का प्रमुख नेमेसियो ओसेगुएरा सर्भान्तेसको मृत्यु भएपछि देशका विभिन्न भागमा भीषण हिंसा भड्किएको छ।
जालिस्को राज्यमा मेक्सिकन विशेष सुरक्षा बलले गरेको एक अपरेसनका क्रममा घाइते भएका एल मेन्चोको उपचारका लागि मेक्सिको सिटी लैजाँदै गर्दा बाटोमै मृत्यु भएको थियो। उनको मृत्युको खबर सार्वजनिक भएलगत्तै आक्रोशित कार्टेल सदस्यहरूले देशका २० भन्दा बढी राज्यहरूमा आगजनी, सडक अवरोध र सुरक्षाकर्मीमाथि आक्रमण सुरु गरेका छन्।
यस हिंसात्मक स्थितिलाई नियन्त्रणमा लिन र सुरक्षा व्यवस्था मजबुत बनाउन मेक्सिको सरकारले देशभर करिब ९ हजार ५०० सैनिक परिचालन गरेको छ।
कार्टेलका सदस्यहरूले विभिन्न सहरमा बस तथा अन्य सवारी साधनहरू कब्जामा लिएर सडकको बीचमै जलाउनुका साथै बैंक र स्थानीय व्यापारिक प्रतिष्ठानहरूमा समेत क्षति पुर्याएका छन्। पछिल्लो हिंसामा परी मेक्सिकोको नेसनल गार्डका कम्तीमा २५ सदस्यसहित ३० भन्दा बढी व्यक्तिको मृत्यु भएको पुष्टि भएको छ।
राष्ट्रपति क्लाउडिया सेनबाउमले सेनाको यस कारबाहीको प्रशंसा गर्दै देशमा शान्ति र सुव्यवस्था कायम गर्नु सरकारको उच्च प्राथमिकता रहेको बताए ।
