प्रधानसेनापति अशोकराज सिग्देलले शिवपुरीस्थित सैनिक कमान्ड तथा स्टाफ कलेजमा सञ्चालित ३२औं समूहको तालिममा सर्वोत्कृष्ट शिक्षार्थीलाई पुरस्कार प्रदान गरेका छन् । 

कलेजमा आज आयोजित दीक्षान्त समारोहमा उनले प्रथम हुने सेनानी दीपेन्द्रविक्रम केसी सर्वोत्कृष्ट तथा भारतीय सेनाका मेजर अनमोल चौधरीलाई सर्वोत्कृष्ट अन्तर्राष्ट्रिय शिक्षार्थी अधिकृतको पुरस्कार प्रदान गरेका हुन् ।

सो अवसरमा प्रधानसेनापति सिग्देलले कलेजको वार्षिक प्रकाशन शिवपुरी जर्नलको २७औं संस्करण विमोचन गरेका सैनिक जनसम्पर्क तथा सूचना निर्देशनालयले जनाएको छ ।

सोही कार्यक्रममा ‘मास्टर इन स्टाटेजिक स्टडिज’मा कार्यक्रमतर्फ प्रथम भएका भारतीय सेनाका मेजर चौधरीलाई त्रिभुवन विश्वविद्यालयका उपकुलपति प्राध्यापक डा. दीपक आचार्यले पुरस्कार प्रदान गरे ।

‘कमाण्डान्ट पेपर’तर्फ प्रथम भएका सेनानी सञ्जय सिलवाल र सहसेनानी विनोदकुमार गुरागाईंलाई शिक्षाधिकृत उपरथी भुवन खत्रीले पुरस्कार प्रदान गरे ।

उक्त तालिम नेपाली सेनाका ८१, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभागका एक/एक तथा मित्रराष्ट्र बङ्गलादेश, चीन, भारत, केन्या, माल्दिभ्स, नाइजेरिया र पाकिस्तानका गरी सात विदेशीसहित ९१ जना अधिकृतले पूरा गरेका सेनाले जनाएको छ ।

सैनिक कमान्ड तथा स्टाफ कलेजबाट हालसम्म नेपाली सेनाका एक हजार ३०८, नेपाल प्रहरीका १७, सशस्त्र प्रहरी बल नेपालका २९, राष्ट्रिय अनुसन्धान विभागका २०, रक्षा मन्त्रालयका एक र विभिन्न राष्ट्रहरूका १३२ शिक्षार्थी अधिकृत प्रशिक्षित भएका छन् ।