२८ जेठ २०८३, बिहीबार
नेकपा एमालेका उपाध्यक्ष विष्णु पौडेल लगातार पाँचौं जित निकाल्ने योजनासहित चुनावी मैदानमा छन् । यही फागुन २१ हुने निर्वाचनका लागि उनी रुपन्देही-२ बाट उम्मेदवार छन् ।
पूर्व उपप्रधानमन्त्री एवं अर्थमन्त्रीसमेत रहेका पौडेल लुम्बिनी प्रदेशबाट २०६४ यताका सबै संसदीय चुनाव जित्ने एक्ला नेतामा पर्छन् ।
नागरिकको आवश्यकता र मुलुकको परिवेश अनुसार एजेन्डा बनाएर काम गर्ने नेतामा पर्छन् पौडेल । पार्टी र संसदीय राजनीतिको व्यवस्थापक, अर्थ रणनीतिकार, पार्टीको संकटमोचक र विकासमुखी सोचका पक्षपाति पौडेललाई गृहजिल्लामा ‘विकासको ब्राण्ड’को रूपमा परिचित छन् ।
सँगै नीतिगत आर्थिक स्पष्टता, पार्टी संगठनको खम्बा, दक्ष कूटनीति सञ्चालन, लगानी प्रवर्द्धनको पक्षपाति पौडेलका थप पहिचान हुन् ।
तीन दशक बढी राष्ट्रिय राजनीतिमा प्रभावशाली भूमिका निभाइरहेका पौडेललाई सरकार र पार्टीको सफल नेतृत्व गर्ने राजनीतिज्ञका रूपमा चर्चा हुन्छ ।
२०५६ देखि रूपन्देहीलाई आफ्नो राजनीतिक भूगोल बनाएर पौडेलले बुटवलबाट संसदीय र पार्टी राजनीतिमा छलाङ मात्र मारेनन् जिल्लालाई पनि उहीँ गतिमा उचाइमा पुर्याएको मान्नेहरू धेरै छन् ।
रूपन्देहीको बुटवल–भैरहवा आकर्षक ‘सिक्स लेन’ सडक, जोखिमपूर्ण सिद्धबाबा सडकखण्डमा सुरूङमार्ग, बुटवल अन्तर्राष्ट्रिय सभाहल, अन्तर्राष्ट्रिय प्रदर्शनी स्थल, लुम्बिनी बौद्ध विश्वविद्यालय, बुटवल–नारायणगढ र बुटवल–गोरूसिंङगे–चन्द्रौटा चार लेन सडक, तिनाउ नदीमा सिग्नेचर बृज, तिनाउ दानव करिडोर, बेलबास बेथरी सडक, ठूला आयोजना पौडेलकै अगुवाइमा भित्र्याएर सञ्चालनमा छन् ।
पौडेलकै पहलमा मोतिपुर औद्योगिक क्षेत्रले गति लियो भने तिलोत्तमामा टिचिङ अस्पतालको अवधारणा कार्यान्वयनतर्फ गएको छ । बुटवल-पोखरा डेडिकेटेड डबल लेनको जग बसाउनेदेखि भैरहवाको गौतमबुद्ध अन्तर्राष्ट्रिय विमानस्थलमा उनले निर्णायक भूमिका खेले भने कालिकानगर मोनोपोल र कर्साघाट कृषि उपज केन्द्र उनकै पहलमा सम्भव भएका हुन् ।
पौडेलको पहलमा भित्रिएका ६ दर्जन ठूला आयोजनामध्ये केही सम्पन्न भइसकेका छन, केही निर्माणाधीन र केही निर्माणको प्रक्रियामा गएका छन् । शिक्षा, स्वास्थ्य, खेलकुद, सडक, विद्युत, धार्मिक क्षेत्रमा पौडेलले अगाडि बढाएका विकासका पूर्वाधारले रूपन्देहीले विकासमा फड्को मारेको छ ।
राजनीतिक विश्लेषक रामचन्द्र श्रेष्ठले रुपन्देहीको भौतिक र पूर्वाधार विकासमा बढी योगदान रहेको बताउँछन् । ‘पूर्वाधार पहिलो प्राथमिकता हो, त्यसले अरू व्यापार व्यवसाय सृजना गर्नुपर्ने हुन्छ’, श्रेष्ठ भन्छन्, ‘यसले नागरिकको मनोविज्ञानमा सकारात्मक प्रभाव पारेको देखिन्छ । त्यो मनोविज्ञानले निर्वाचनमा काम गरिरहेको जस्तो देखिन्छ ।’
श्रेष्ठले यस क्षेत्रका उद्योगी र व्यवसायीहरूले पनि विष्णु पौडेललाई खोजिरहने बताउँछन् । ‘किनभने, केन्द्रीय स्तरको नेता भयो भने, उद्योगी व्यवसायीलाई पनि सहज हुन्छ भन्ने मनोविज्ञान छ । त्यसले पनि प्रेसर क्रियट गरेर उहाँ पाल्पा जाने निर्णयबाट बुटवल आएको हुनसक्छ । रुपन्देही पूर्वाधारको एक चरणको विकास भएको छ । अब उहाँसँग नयाँ एजेन्डाहरू ल्याउनुपर्छ’, श्रेष्ठ भन्छन् ।
पार्टीको जनसंगठन बनाउन देशका सबैजसो जिल्लामा पुगेर खारिएर पौडेल सादा जीवनशैलीमा विश्वास राख्छन् । यस पटकको उम्मेदवारीलाई पौडेलले जिल्लाका थप विकास र पहिचानको मुद्दासँग जोडेका छन् ।
‘अब जिल्लालाई देशकै नमूना क्षेत्र बनाउने र भौतिकसँगै मानवीय र रोजगारी सृजना गर्ने मेरो लक्ष्य छ’, पौडेल भन्छन् ।
पार्टी र सरकारमा हुँदा पौडेलले रुपन्देहीको विकासलाई नै मुख्य एजेन्डाका रूपमा अगाडि बढाएको एमाले जिल्ला अध्यक्ष यज्ञ गैरे बताउँछन् । उनले रुपन्देहीको विकासबाट लाभ लिएका मतदाताले पौडेललाई बिर्सिन नचाहेको बताए ।
‘रुपन्देहीको प्रतिष्ठाका लागि उहाँ फेरि उम्मेदवार हुनुभएको छ । जिल्लाको विकासका लागि, प्रतिष्ठाका लागि फेरि एक रुपन्देहीबासीले भारी मतसहित जिताउनेछन् । किनकि विष्णु पौडेललाई जिताउनु भनेको लुम्बिनी प्रदेश संघीय सत्ताको प्राथमिकतामा राख्नु हो ।’
२०७० को संविधानसभा निर्वाचनमा रूपन्देहीबाट बाबुराम भट्टराईलाई पराजित गरेपछि उनी राष्ट्रिय राजनीतिमा बढ्ता प्रभावशाली देखिएका थिए । तत्कालीन एमालेको पहिलो ९ महिने शासनकालमा सरकारमा नगइ संगठन विभाग प्रमुख बनेका पौडेल पार्टीभित्र पनि शक्तिशाली खेलाडी हुन् ।
स्याङ्जाको पुतलीबजारमा २०१६ मा जन्मिएका पौडेललेपटक–पटक सरकारको अनुभव लिइसकेका छन् । २०५१ मा संसदीय यात्रा शुरू गरेपछि २०५४ सालमा युवा, खेलकुद तथा संस्कृति मन्त्री बनेका थिए । उनी २०६५ सालको संयुक्त सरकारमा जलस्रोत मन्त्री बनेका थिए ।
त्यसैगरी, २०६७ सालको अर्को संयुक्त सरकारमा उनी रक्षामन्त्री र २०७२ मा तत्कालीन माओवादीसँगको गठबन्धन सरकारमा उनी पहिलो पटक अर्थमन्त्री बनेका थिए ।
२०५१ मा पाल्पा–३ बाट प्रतिनिधिसभा सदस्यमा जितेका उनी २०५६ मा रुपन्देहीमा चुनाव लड्दा पराजित भएका थिए । तर, २०६४ र २०७० मा साबिक रूपन्देही क्षेत्र–४ बाट संविधानसभा चुनावमा विजयी भए । २०७४ र २०७९ मा रुपन्देही–२ बाट विजयी भएका थिए ।
