२५ जेठ २०८३, सोमबार
नेपाल कम्युनिस्ट पार्टी (एमाले)का अध्यक्ष केपी शर्मा ओलीले फागुन २१ अर्थात् आजको दिन आफ्नो जीवनमा दुई संयोग भएको स्मरण गरेका छन् । उनले फागुन २१ कहिल्यै नबिर्सने दिन भएको पनि उल्लेख गरेका छन् ।
पूर्वप्रधानमन्त्री समेत रहेका ओलीले सामाजिक सञ्जाल फेसबूकमा लेखेका छन्- ‘आज सुखानी शहीद दिवस हो भने आजकै दिन ६ वर्षअघि मेरो दोस्रो पटक मिर्गौला प्रत्यारोपण भएको थियो । यी दुवै दिन मैले मृत्युको मुखमा पुगेर पुनर्जीवन पाएका दिन हुन् ।’
ओलीले सञ्जालमा लेख्दै झापा आन्दोलनले निरंकुश व्यवस्थाको विरुद्ध विद्रोहको बिगुल फुकेको र त्यही क्रममा आफूलाई जेल हालिएको स्मरण गरेका छन् ।
‘झापा आन्दोलनका योद्धाहरू रामनाथ दाहाल, नेत्र घिमिरे, वीरेन राजवंशी, कृष्ण कुइँकेल र नारायण राजवंशीलाई जेल सार्ने बहानामा निरंकुश व्यवस्थाले सुखानीको जंगलमा लगेर हत्या गरेको थियो। जेल सार्ने बहानामा हत्या गरिनलाग्दा पनि मृत्युको मुखबाट फर्केर आएको थिएँ र १४ वर्षको कठोर कारावास बिताएको थिएँ,’ उनले लेखेका छन् ।
ओलीले अगाडि थप लेखेका छन्, ‘देशलाई लोकतन्त्रको उज्यालो बिहानीमा लैजान बलिदान गरेका अमर शहीदहरू रामनाथ दाहाल, नेत्र घिमिरे, वीरेन राजवंशी, कृष्ण कुइँकेल र नारायण श्रेष्ठप्रति भावपूर्ण श्रद्धाञ्जली अर्पण गर्दछु।’
