जनता समाजवादी पार्टी (जसपा) नेपालका अध्यक्ष उपेन्द्र यादवले अहिलेको चुनावी परिणामले मधेश आन्दोलनका उपलब्धि धरापमा पर्नसक्ने बताएका छन् । फेरि संघर्ष गर्नुपर्ने अवस्था आउनसक्ने उनको चिन्ता छ ।

मधेशी दलले अपेक्षित परिणाम ल्याउन नसकेको विषयमा लोकान्तरले सोधेको प्रश्नमा यादवले जनताले नयाँ खोजेकाले आफूहरू पराजित भएको बताए । यसले आफूहरूलाई खासै फरक भने नपर्ने उनको दाबी छ ।

‘हामीलाई यसले खासै फरक पर्दैन । संघर्ष, क्रान्ति र परिवर्तनको बाटोबाट अगाडि बढिरहेको पार्टीलाई संघर्ष गरेर एउटा-दुईटा सिट आउँदा, जाँदा, पाँच-दशवटा हुँदा-नहुँदा के फरक पर्छ र ?,’ यादवले लोकान्तरसँग भने, ‘तर जहाँसम्म जनताको कुरा गर्नुभयो, यसपालि जनताले नयाँ खोज्या थिए, नयाँलाई दिए । अब जनताका सबै काम नयाँले गरुन् । त्यसबाट अपेक्षा जनताले राख्या छन् ।’

सप्तरी- ३ बाट जसपा नेपालका अध्यक्ष उपेन्द्र यादव आफैं पराजित हुनुका साथै प्रतिनिधि सभामा जसपा नेपालले एक सीट पनि जित्न सकेन ।

राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) लाई प्रधानमन्त्री बनाउने भनेर जनताले मतदान गरेको भन्ने कुरालाई भने उनले अस्विकार गरेका छन् । बालेनभन्दा पनि नयाँलाई नै दिने भनेर जनताले मतदान गरेको उनले बताए ।

‘अब त्यो त पब्लिकले भन्ने हो। तर, मैले त सुनेको नयाँ नै हो । नयाँ–नयाँ भन्ने वर्ड मात्रै सुनिराख्या थिएँ मैले,’ यादवले लोकान्तरसँग भने ।

संघमा पटक–पटक सरकारमा गएको तथा मधेश प्रदेश सरकारमा ७ वर्ष जसपाले नेतृत्व गरे पनि अपेक्षाअनुसार काम गर्न नसकेको प्रतिक्रिया स्वरूप जनताले यस्तो मतादेश दिएको त होइन ? भन्ने प्रश्नमा उनले भने, ‘हैन, अब देशैभरि छ, मधेशमा मात्र के कुरा गर्नु ? पहाडमा पनि छ । हिमालमा पनि छ । देशमा पनि छ । मधेशमा पनि छ । सबै ठाउँमा त्यसको असर पर्‍या हो ।’

मधेस आन्दोलनबाट प्राप्त धेरै उपलब्धिहरू धरापमा परेको तथा ती उपलब्धिलाई जोगाउन फेरि जसपाले नै संघर्ष गर्नुपर्ने उनले बताए ।

‘संघीय लोकतान्त्रिक गणतन्त्र, धर्मनिरपेक्षता र समावेशी लोकतन्त्रलाई जोगाउन, प्राप्त उपलब्धिलाई जोगाउन जनता समाजवादी पार्टी रहुञ्जेल लडिरहन्छ,’ उनले थपे, ‘नयाँ–नयाँ भनेर परिवर्तन हुनुमा विगतका सरकारहरूले गरेका कामहरू पनि होलान् । अब धेरै कुराहरू छन् । सत्य-तथ्य त अहिलेसम्म बाहिर आइसकेको छैन, आएपछि सब भनूँला । अहिलेलाई यत्ति ।’

सुन्नुहोस्, अडियो :