०७ साउन २०८३, बिहीबार
भारतको इन्दौरमा विद्युतीय कार चार्ज गर्ने क्रममा सर्ट सर्किट भएर आगलागी हुँदा आठ जनाको मृत्यु भएको छ । दुर्घटनामा रबर व्यवसायी मनोज पुगलिया र उनकी गर्भवती बुहारी सिमरनसहित आठ जनाको मृत्यु भएको भारतीय सञ्चार माध्यमहरूले जनाएका छन् । दुर्घटनामा चार जना घाइते भएका छन् ।
मृतकमध्ये छ जना मनोजका आफन्त थिए, जो मंगलबार बिहारको किशनगंजबाट आएका थिए। घटना बुधबार बिहान ४ बजेतिर भएको हो ।
प्रहरीका अनुसार कारबाट घरमा फैलिएको आगोले भित्र भण्डारण गरिएका ग्यास सिलिन्डरहरू समेत जलेका थिए, जसका कारण एकपछि अर्को विस्फोट भए।
विस्फोटले घरको एक भाग भत्किएको थियो । आगलागीको खबर पाएको लगभग एक घण्टापछि दमकलका गाडीहरू घटनास्थलमा पुगेका थिए ।
