०१ असार २०८३, सोमबार
कैलालीस्थित टीकापुर सीमा सुरक्षा गुल्मका सशस्त्र प्रहरी बल नेपालका डीएसपी प्रदीप पौडेलमाथि हातपात भएको छ ।
गुल्मभित्रै छिरेर केही युवाले उनीमाथि हातपात गरेका हुन् । सशस्त्र प्रहरी बल प्रधान कार्यालयका अनुसार, तस्करीको केही सामान बरामद गरेको विषयमा विवाद हुँदा उनीमाथि युवाहरू हातपातमा उत्रिएका हुन् ।
डीएसपी पौडेलमाथि गरिएको अभद्र व्यवहारको भिडियो यतिबेला सामाजिक सञ्जालमा भाइरल बनेको छ ।
यस घटनाबारे सशस्त्र प्रहरी मुख्यालयले छानबिन थालेको छ । छानबिनका लागि गुल्मका अधिकांश सुरक्षाकर्मीलाई फिर्ता बोलाउने तयारी गरिएको छ । उनीहरूलाई नम्बर ३४ गण कैलालीमा बोलाउने तयारी गरिएको सशस्त्र प्रहरीले जनाएको छ ।
सशस्त्र प्रहरी बलका सहप्रवक्ता एवं डीएसपी शैलेन्द्र थापाले घटनाको छानबिन गर्न ४३ नम्बर गणका प्रमुख तथा एसपी अनिल कार्कीको टोली टीकापुरस्थित सीमा सुरक्षा गुल्ममा पुगेको बताए ।
