२८ जेठ २०८३, बिहीबार
चितवनको भरतपुर महानगर प्रज्ञा प्रतिष्ठानले विभिन्न विधाका स्रष्टालाई सम्मान तथा पुरस्कार प्रदान गरेको छ ।
भरतपुर महानगरपालिकाको सभाकक्षमा बिहीबार आयोजित कार्यक्रममा महानगरपालिकाका कार्यवाहक प्रमुख चित्रसेन अधिकारी र प्रज्ञा प्रतिष्ठानका अध्यक्ष इन्द्रप्रसाद रेग्मीले संयुक्त रूपमा सम्मान तथा पुरस्कार वितरण गरेका हुन् ।
कार्यक्रममा ‘कृष्ण बम मल्ल प्रज्ञा सम्मान’ नारायणप्रसाद खनाललाई प्रदान गरिएको छ, जसको राशी ५० हजार ७८ रूपैयाँ रहेको छ ।
यस्तै ‘भरतपुर प्रज्ञा सम्मान’ विजय गुरुङलाई प्रदान गरिएको छ । यो पुरस्कारको राशी पनि ५० हजार ७८ रूपैयाँ रहेको छ ।
विधागत रूपमा प्रदान गरिएका ‘भरतपुर प्रज्ञा पुरस्कार’ अन्तर्गत काव्यतर्फ गोविन्दगोपाल खतिवडाको ‘वासना कि उपासना’ कवितासङ्ग्रह, निबन्धतर्फ सञ्जीव पौडेलको ‘छोटु’ संस्मरण तथा आख्यानतर्फ सुभाष घिमिरेको ‘सान्दाजू’ उपन्यास पुरस्कृत भएका छन् । प्रत्येक पुरस्कारको राशी २५ हजार ७८ रूपैयाँ रहेको छ ।
त्यसैगरी, ‘वागीश्वरी प्रज्ञा पुरस्कार’ गायत्री अधिकारीको ‘वर्तमान’ उपन्यासलाई प्रदान गरिएको छ । यो पुरस्कारको राशी पनि २५ हजार ७८ रूपैयाँ रहेको छ ।
कार्यक्रममा सम्मानित स्रष्टाहरूको व्यक्तित्व र कृतित्वमाथि केदारनाथ खनालले टिप्पणी राखेका थिए ।
