३० जेठ २०८३, शनिबार
लन टेनिस खेलको विकास र प्रबर्द्धन गर्ने उद्देश्यसहित बुटवलमा खुला लन टेनिस प्रतियोगिता हुने भएको छ ।
रूपन्देही लन टेनिस संघले यही चैत १६ गतेदेखि चौथो मेयर कप तथा आठौं बुटवल खुला लन टेनिस प्रतियोगिता गर्न लागेको हो ।
बुटवल उपमहानगरपालिका–११ देवीनगरस्थित टेनिस कोर्टमा हुने प्रतियोगितामा पुरुष तथा महिला एकल र डबल गरी ११ विधामा प्रतिस्पर्धा हुनेछ ।
संघका अध्यक्ष विष्णुप्रसाद चापागाईंले ५ दिनसम्म चल्ने प्रतियोगितामा नेपाल र भारतका गरी २०० भन्दा बढी पुरुष र महिला खेलाडीहरूको सहभागिता रहने जानकारी दिए ।
प्रतियोगितामा एकलतर्फ पुरुष/महिला, ३५ प्लस, ४५ प्लस, ५५ प्लस र ६५ प्लस गरी ६ वटा विद्या रहेका छन् ।
डबलस्तर्फ पुरुष डबल्स, महिला डबल्स पुरुष ३५ प्लस, पुरुष ४५ प्लस र पुरुष ५५ प्लस गरी पाँच विधा हुनेछन् ।
जसमा एकलतर्फ पहिलो, दोस्रो र तेस्रो हुनेलाई नगदसहित शिल्ड, पदक र प्रमाणपत्र प्रदान गरिने छ भने डबल्सतर्फ पहिलो र दोस्रो हुनेलाई मात्र पुरस्कारको व्यवस्था गरिएको अध्यक्ष चापागाईंले बताए ।
‘प्रतियोगिताले यस क्षेत्रमा लन टेनिस खेलसँगै भौतिक संरचनाको विकास हुने हाम्रो आशा छ,’ अध्यक्ष चापागाईंले भने ।
प्रतियोगिताको लागि २६ लाख ६७ हजार ५०० रुपैयाँ खर्च लाग्ने अनुमान गरिएको संघका सचिव मनोज नेपालले जानकारी दिए ।
२०५७ मा राजधानी बाहिर शुरू गरिएको राष्ट्रिय स्तरको लन टेनिस प्रतियोगिता संघले निरन्तर गर्दै आएको सचिव नेपालले बताए ।
