अख्तियार दुरुपयोग अनुसन्धान आयोगले दैलेखको गुराँस गाउँपालिकामा गिट्टी, बालुवा, ढुङ्गा तथा ग्राभेल उत्खनन् ठेक्कामा अनियमितता गरी २२ लाख रूपैयाँभन्दा बढी राजस्व हिनामिना गरेको आरोपमा दुई जनाविरुद्ध मुद्दा दायर गरेको छ । 

गुराँस गाउँपालिकाका तत्कालीन प्रमुख प्रशासकीय अधिकृत दीपककुमार आचार्य र आर.के. कन्स्ट्रक्सनका सञ्चालक सुवास कार्कीविरुद्ध आयोगले सोमबार विशेष अदालत काठमाडौंमा आरोपपत्र दायर गरेको हो ।

आयोगका अनुसार आर्थिक वर्ष २०७८/०७९ मा कर्णाली नदी र लोहरेखोला क्षेत्रबाट ३० हजार घनमिटर गिट्टी, बालुवा, ढुङ्गा र ग्राभेल उत्खनन्, संकलन तथा बिक्रीका लागि न्यूनतम् १६ लाख ६० हजार रूपैयाँमा ठेक्का आह्वान गरिएको थियो । उक्त ठेक्कामा आर.के. कन्स्ट्रक्सनले ३० लाख ५० हजार रूपैयाँ कबोल गरेको थियो ।

तर सम्झौताअनुसार कबोल रकम र १३ प्रतिशत मूल्य अभिवृद्धि करसहित ३४ लाख ४६ हजार ५०० रूपैयाँ बुझाउनुपर्नेमा किस्ताबन्दी सर्त राख्दै बैंक जमानतसमेत नलिई सम्झौता गरिएको र केवल १२ लाख २ हजार रूपैयाँ मात्र दाखिला गरिएको आयोगका प्रवक्ता सुरेश न्यौपानेले जनाएका छन् । 

यसरी बाँकी २२ लाख ४४ हजार ५०० रूपैयाँ राजस्व नबुझाइ गाउँपालिका र नेपाल सरकारलाई हानि नोक्सानी पुर्‍याइएको ठहर गरिएको छ ।

आयोगले उक्त रकम बिगो कायम गर्दै दुवै जनाविरुद्ध कानुनबमोजिम सजायको माग गर्दै विशेष अदालत काठमाडौंमा आरोपपत्र दायर गरेको प्रवक्ता न्यौपानेले बताए ।