२३ जेठ २०८३, शनिबार
बागलुङको बडिगाड गाउँपालिका–७ मा भारत सरकारको लागनीमा भिमगिठे स्वास्थ्य चौकीको भवन बन्ने भएको छ ।
भारत सरकारको २.५ करोड रूपैयाँ (नेपाली)मा बन्ने उक्त भवनको बिहीबार बडिगाड गाउँपालिकाका अध्यक्ष गण्डकी थापा अधिकारी र भारतीय राजदूतावास, काठमाडौंका द्वितीय सचिव अजय कुमार सिंहले संयुक्त रूपमा शिलान्यास गरे ।
यो उच्च प्रभाव सामुदायिक विकास परियोजना बागलुङको बडिगाड गाउँपालिकामार्फत् कार्यान्वयन नेपालस्थित भारतीय दूतावासले जनाएको छ ।
कार्यक्रममा बडिगाड गाउँपालिकाका अध्यक्ष अधिकारी तथा अन्य सरोकारवालाहरूले भारत सरकारद्वारा प्रदान गरिँदै आएको विकास सहयोगको प्रशंसा गरे । नयाँ संरचनाले बडिगाड गाउँपालिकामा स्वास्थ्य सेवाको पहुँचमा सुधार ल्याउन मद्दत पुग्ने समेत उनीहरूको विश्वास छ ।
नजिकका छिमेकीको रूपमा भारत र नेपालबीच व्यापक र बहुक्षेत्रीय सहकार्य रहँदै आएको छ ।
उच्च प्रभाव सामुदायिक विकास परियोजनाको कार्यान्वयनले प्राथमिकताका क्षेत्रमा पूर्वाधार विकास गर्नुका साथै विकास र समृद्धिलाई अगाडि बढाउने नेपाल सरकारको प्रयासलाई सुदृढ पार्न भारत सरकारको निरन्तर सहयोगलाई प्रतिबिम्बित गर्ने दूतावासले जनाएको छ ।
