गण्डकी प्रदेशले १६ औं केन्द्रीय राष्ट्रपति रनिङ शिल्ड खेलकुद प्रतियोगिताअन्तर्गत एथलेटिक्सको छात्र चार गुणा चार सय मिटर रिले दौडमा बिहीबार नयाँ जुनियर राष्ट्रिय कीर्तिमान बनाएको छ ।

त्रिपुरेश्वरस्थित दशरथ रंगशालमा अतित थापा, आर्यन राना मगर, अंकित रानाभाट र सुदिप भण्डारी सम्मिलित गण्डकीको टोलीले निर्धारित दूरी तीन मिनेट २७.९ सेकेन्डमा तय गर्दै कीर्तिमान बनाएका हुन् ।

यसअघि तीन मिनेट ३०.९ सेकेन्डको कीर्तिमान बागमती प्रदेशका प्रवीण राना मगर, हस्त सुनार, निरज शाह र सन्तबहादुर दराइको नाममा थियो । उनीहरूले उक्त कीर्तिमान यही प्रतियोगिताको गत संस्करणमा बनाएका थिए ।

तीन मिनेट ३०.७ सेकेन्डको समय निकाल्दै बागमतीका सप्रेश अधिकारी, निरज शाह, हस्त सुनार र सचिन थिङको टोली दोश्रो भयो । सुदूरपश्चिम प्रदेशका सुरेश चौधरी, चित्रबहादुर केसी, विराज सुनार र बरुणदत्त रानाको टोली तेश्रो भयो ।

सोही स्पर्धाको छात्रातर्फ बागमती प्रदेशका सुरुची मोक्तान, अनिशा थारू, भगवती खड्का र सर्मिला विकको टोली पहिलो भयो । यो टोलीले निर्धारित दूरी चार मिनेट १८.१ सेकेन्डमा पूरा गर्‍यो ।

लुम्बिनी प्रदेशका अनुजा चौधरी, रोशनी कामी, करिश्मा खड्का र दुर्गा विकको टोली दोश्रो तथा सुदूरपश्चिमका उषा चौधरी, विजया चटौल, स्वस्तिका शाह र कमल जैशीको टोली तेश्रो भए ।

राष्ट्रिय खेलकुद परिषद् (राखेप)को आयोजनामा भइरहेको प्रतियोगिताको छात्र लङजम्पमा सुदूरपश्चिमका विक्रम नाथ पहिलो भए । उनले ६.६० मिटर जम्प गरे । बागमतीका दीपेन्द्र गिरी दोस्रो र विशाल गुरुङ तेश्रो स्थानमा रहे ।

सोही स्पर्धाको छात्रातर्फ ५.०८ मिटर जम्प गर्दै बागमती प्रदेशकी अनिशा थारू पहिलो भइन् । सुदूरपश्चिमकी उषा चौधरी दोश्रो र लुम्बिनी प्रदेशकी गरिमा चौधरी तेश्रो भए ।

छात्र ज्याभ्लिन थ्रोमा सुदूरपश्चिमका लोकेश ऐरीले स्वर्ण जिते । उनले ५६.३२ मिटर थ्रो गरे । लुम्बिनीका अमित थारूले रजत र कोशी प्रदेशका सोहेल मनसोलीले कांस्य पदक जिते ।

सोही स्पर्धाको छात्रातर्फ सुदूरपश्चिमकी पूजा साउद पहिलो भइन् । पूजाको उत्कृष्ट थ्रो ३५.४२ मिटर रह्यो । कोशीकी उमिता राई र कर्णाली प्रदेशकी सरिता शाह क्रमश: दोश्रो र तेश्रो भए ।

छात्र आठ सय मिटर दौडमा बागमतीका हस्त सुनार पहिलो भए । उनले दुई मिनेट ००.२ सेकेन्डमा दौड पूरा गरे । कर्णालीका सुमन सुनार दोश्रो र लुम्बिनीका सचिन कुर्मी तेश्रो भए ।

सोही स्पर्धाको छात्रातर्फ बागमती प्रदेशकी भगवती खड्का दुई मिनेट २२.१ सेकेन्डसहित पहिलो भइन् । सुदूरपश्चिमकी स्वस्तिका शाह दोश्रो र गण्डकी प्रदेशकी आस्मा अधिकारी तेश्रो भए ।