विश्वकै सबैभन्दा ठूलो कण्डम उत्पादक कम्पनी कारेक्सले इरानसँग सम्बन्धित युद्धका कारण कच्चा पदार्थ आपूर्तिमा अवरोध आएपछि कण्डमको मूल्य ३० प्रतिशतसम्म वा अझ बढी बढाउन सकिने जनाएको छ ।

कम्पनीका प्रमुख कार्यकारी अधिकृत गोह मियाह कियातले सञ्चारमाध्यमसँग कुरा गर्दै द्वन्द्व शुरू भएयता उत्पादन लागत उल्लेख्य रूपमा बढेको बताएका छन् ।

मलेसियामा आधारित यस कम्पनीले वार्षिक पाँच अर्बभन्दा बढी कण्डम उत्पादन गर्दै ड्युरेक्स र ट्रोजनजस्ता विश्वप्रसिद्ध ब्रान्डलाई आपूर्ति गर्ने गर्दछ । साथै, बेलायतको एनएचएसजस्ता सरकारी स्वास्थ्य प्रणालीलाई समेत यसले सामग्री उपलब्ध गराउँदै आएको छ ।

इरानले अमेरिका र इजरायलको हवाई आक्रमणपछि होर्जुम जलडमरु हुँदै जाने जहाजलाई लक्षित गर्ने चेतावनी दिएपछि विश्वव्यापी तेल आपूर्ति गम्भीर रूपमा प्रभावित भएको छ । यसले उक्त समुद्री मार्ग लगभग बन्दजस्तै भएको र आपूर्ति शृंखलामा ठूलो असर परेको जनाइएको छ ।

विश्वको करिब २० प्रतिशत कच्चा तेल र द्रवीकृत प्राकृतिक ग्यास (एलएनजी) यही मार्गबाट ओसारपसार हुने गर्दछ। कण्डम उत्पादनमा प्रयोग हुने लेटेक्स जोगाउन आवश्यक अमोनिया र सिलिकनमा आधारित स्नेहक जस्ता पदार्थ तेलबाटै प्राप्त हुने भएकाले लागत बढेको कम्पनीले जनाएको छ ।

यस वर्ष कण्डमको माग करिब ३० प्रतिशतले बढेको छ भने ढुवानी लागत वृद्धि र ढिलाइले अभाव झन् बढाएको गोहले बताएका छन् ।

उनका अनुसार, अनिश्चितताका बेला मानिसहरू भविष्यप्रति सचेत हुने भएकाले कण्डमको प्रयोग अझ बढ्ने गर्छ । उनले थपे, ‘अहिले सन्तान जन्माए थप जिम्मेवारी बढ्छ ।’

इरान–अमेरिका–इजरायलबीचको द्वन्द्वले ऊर्जा बजार मात्रै होइन, उपभोक्ता सामग्रीको मूल्यमा पनि प्रभाव पारिरहेको देखिएको छ । यसकै प्रभावस्वरूप हवाई भाडा औसतमा २४ प्रतिशतले बढेको अध्ययनहरूले देखाएका छन् ।

त्यस्तै, खाडी क्षेत्र हुँदै हुने ढुवानीमा अवरोध आउँदा मलको मूल्य बढेको, हेलियमको अभाव देखिएको तथा बोतलमा पानी उत्पादन गर्ने उद्योग पनि कच्चा पदार्थ अभावका कारण दबाबमा परेको जनाइएको छ ।

यसअघि संयुक्त राष्ट्रसंघले ढुवानी लागत बढेकै कारण चिनी, दुग्धजन्य पदार्थ र फलफूलको मूल्यसमेत बढ्ने चेतावनी दिएको थियो ।

उता, अमेरिका र इरानबीच शान्ति वार्ताको अवस्था अझै स्पष्ट छैन । अमेरिकी राष्ट्रपति डोनाल्ड ट्रम्पले वार्ता प्रगति नभएसम्म युद्धविराम अवधि लम्ब्याउने बताएका छन् ।