२८ जेठ २०८३, बिहीबार
सन् २०२६ को अप्रिल महिनामा नेपाल भ्रमण गर्ने विदेशी पर्यटकको संख्या घटेको छ।
उक्त महिनामा कुल १ लाख ७ हजार ९ सय ३४ विदेशी पर्यटक नेपाल आएका छन्, जुन अघिल्लो महिनाको तुलनामा करिब १३ हजारले कम हो।
सन् २०२६ कै मार्च महिनामा नेपाल आउने विदेशी पर्यटकको संख्या १ लाख २० हजार ५ सय १६ रहेको थियो।
अध्यागमन विभागका प्रवक्ता टीकाराम ढकालका अनुसार दक्षिण एसियाली क्षेत्रीय सहयोग संगठन (सार्क) सदस्य राष्ट्रहरूबाट मात्रै ३३ हजार ४ सय ९६ पर्यटक नेपाल आएका छन्, जुन कुल आगमनको करिब ३१ प्रतिशत हो।
यसमध्ये भारतबाट सबैभन्दा बढी २५ हजार १ सय ९६ पर्यटक आएका छन्। त्यस्तै, बंगलादेशबाट ५ हजार २ सय ३१ र श्रीलंकाबाट १ हजार ४ सय ९ पर्यटकले नेपाल भ्रमण गरेका छन्। पर्यटक आगमनको सूचीमा भारत पहिलो स्थानमा रहेको छ।
ढकालका अनुसार एसियाली अन्य मुलुकहरूतर्फ हेर्दा चीनबाट ११ हजार ७ सय २२, म्यानमारबाट २ हजार ६ सय २६ र थाइल्याण्डबाट २ हजार २ सय १ पर्यटक नेपाल आएका छन्।
अप्रिल महिनामा नेपालमा सबैभन्दा धेरै पर्यटक पठाउने पाँच मुलुकमध्ये भारत पहिलो स्थानमा रहँदा चीन दोस्रो, संयुक्त राज्य अमेरिका तेस्रो, अस्ट्रेलिया चौथो र बंगलादेश पाँचौँ स्थानमा रहेका छन् ।
