नेपाली कांग्रेसले देशका सातवटै प्रदेशमा प्रदेशस्तरीय भेला गर्ने भएको छ । 

बुधबार बसेको नीति, अनुसन्धान तथा प्रशिक्षण प्रतिष्ठानको पहिलो बैठकले सातै प्रदेशमा ‘प्रदेश र स्थानीय तह केन्द्रित प्रदेश स्तरीय भेला’ गर्ने निर्णय गरेको हो ।

जस अनुसार यही वैशाख २६ र २७ गते कैलालीको धनगढी, २८ र २९ गते सुर्खेतको लेकबेसी तथा वैशाख ३१ र जेठ १ गते कास्कीको पोखरामा भेला आयोजना हुनेछ ।

यसैगरी, जेठ ४ र ५ गते काभ्रेपलाञ्चोकको धुलिखेल, जेठ ६ र ७ गते महोत्तरीको बर्दिवास, जेठ ८ र ९ गते सुनसरीको लौकी र जेठ १४ र १५ गते रुपन्देहीको तिलोत्तमामा भेला हुने कांग्रेस केन्द्रीय कार्यालयका कार्यावाहक मुख्यसचिव कृष्णप्रसाद दुलालले जानकारी दिए । 

उनका अनुसार बुधबारको बैठकमा सभापति गगनकुमार थापाले प्रतिष्ठानका प्रमुख विश्वप्रकाश शर्मालाई शपथ गराएका थिए ।

सभापति थापाले नवनियुक्त सदस्यहरूलाई बधाई एवं शुभकामना दिँदै प्रतिष्ठानको वैधानिकता, काम, कर्तव्य र अधिकारका विषयमा प्रष्ट पारेका थिए ।

त्यसैगरी, प्रतिष्ठानका प्रमुख शर्माले नवनियुक्त सदस्यहरूलाई शपथ गराएका थिए । 

बैठकले प्रतिष्ठानको उपप्रमुखमा मधु आचार्यलाई चयन गरेको छ ।