प्रहरी वृत्त मालीगाउँ, काठमाडौंमा कार्यरत प्रहरी नायब निरीक्षक (सई) दिनेश राउतविरुद्ध भ्रष्टाचार मुद्दा दायर भएको छ ।​​​

सेवाग्राहीसँग लिएको २० हजार रुपैयाँ घुससहित पक्राउ परेका राउतविरुद्ध शुक्रबार विशेष अदालतमा मुद्दा दायर गरिएको अख्तियार दुरुपयोग अनुसन्धान आयोगका प्रवक्ता सुरेश न्यौपानेले जानकारी दिए ।

बैंकिङ्ग कसुरसम्बन्धी मुद्दामा जाहेरवालाको रकम फिर्ता दिलाइदिन सहजीकरण गरिदिने भन्दै उनले सेवाग्राहीसँग घुस मागेका थिए ।

उक्त सूचनाका आधारमा आयोगको टंगालबाट खटिएको टोलीले राउतलाई सेवाग्राहीसँग लिएको २० हजार रुपैयाँसहित नियन्त्रणमा लिइएको थियो।

आयोगले उनीविरुद्ध २० हजार रुपैयाँ बिगो कायम गरी कैद र बिगो बमोजिम जरिवानाको सजाय मागदाबी गरेको छ ।