संयुक्त अरब इमिरेट्स (यूएई) र भारतले रक्षा, ऊर्जा र पानीजहाज सम्बन्धी सम्झौताहरूमा हस्ताक्षर गरेका छन्। भारतीय प्रधानमन्त्री नरेन्द्र मोदीको खाडी राष्ट्र भ्रमणका क्रममा दुई देशबीच रक्षा सम्झौता भएको हो । 

यी सम्झौताहरू शुक्रबार अबु धाबीमा भारतीय प्रधानमन्त्री मोदी र यूएईका राष्ट्रपति शेख मोहम्मद बिन जायद अल नाह्यानबीच भएको भेटवार्ताका क्रममा भएका हुन्, जुन दुई देशबीचको सम्बन्ध सुदृढ गर्ने दिशामा चालिएको पछिल्लो कदम हो ।

आधिकारिक वक्तव्यका अनुसार, रणनीतिक रक्षा साझेदारीले दुवै राष्ट्रले रक्षा औद्योगिक सहकार्य र नवीनता तथा उन्नत प्रविधि, तालिम, अभ्यास, समुद्री सुरक्षा, साइबर रक्षा, सुरक्षित सञ्चार र सूचना आदानप्रदानमा सहयोगलाई गहिरो बनाउने कुरा उल्लेख गरेको छ । सम्झौताको एक प्रमुख क्षेत्र रणनीतिक पेट्रोलियम भण्डारण र तरलीकृत प्राकृतिक ग्यासको आपूर्ति रहेको छ, जसमा युएईको फुजैराहमा कच्चा तेलको सम्भावित भण्डारणलाई भारतको रणनीतिक पेट्रोलियम भण्डारको हिस्सा बनाइने उल्लेख छ।