२५ जेठ २०८३, सोमबार
युवामा प्राविधिक शिक्षा, सीप विकास तथा रोजगारीमुखी तालिमप्रति आकर्षण अभिवृद्धि गर्ने उद्देश्यसहित लुम्बिनी प्रदेशमै पहिलो पटक ‘लुम्बिनी स्किल च्याम्पियनसिप’ गरिने भएको छ ।
‘प्राविधिक शिक्षामा जोड, रोजगारीको अवसरमा नयाँ मोड’ भन्ने मूल नारासहित रुपन्देही उद्योग संघले कार्यक्रम आयोजना गर्न लागेको हो ।
संघले बुधबार पत्रकार सम्मेलन गर्दै यही जेठ ८ गते तिलोत्तमामा कार्यक्रम सञ्चालन गरिने जानकारी दिएको छ । कार्यक्रम सामाजिक विकास मन्त्रालय, लुम्बिनी प्रदेशको समन्वय तथा ‘विगी तथा सम्मानित रोजगारीका लागि सीप परियोजना (इन्स्योर दोस्रो चरण)’को सहयोगमा आयोजना हुन लागेको जनाइएको छ ।
संघका अध्यक्ष कृष्ण पराजुलीले हाल उद्योग तथा व्यवसाय क्षेत्रमा आवश्यक दक्ष जनशक्तिको माग र बजारमा उपलब्ध जनशक्तिको सीपबीच असन्तुलन देखिएको भन्दै त्यसलाई कम गर्न कार्यक्रम उपयोगी हुने बताए ।
‘उद्योग, तालिम प्रदायक संस्था, प्राविधिक शिक्षालय, सरकारी निकाय तथा प्रशिक्षार्थीबीच सहकार्य र समन्वयलाई सुदृढ गर्दै दक्ष जनशक्ति उत्पादन, रोजगारी अवसर प्रवर्द्धन तथा स्वदेशमै सम्मानित रोजगारी सिर्जना गर्ने उद्देश्यले कार्यक्रम आयोजना गरिएको हो’, उनले भने ।
कार्यक्रममा इन्स्योर परियोजनाका लुम्बिनी प्रदेश प्रमुख अम्बिका प्रसाद तिमिल्सिनाले सरकारलाई नीतिगत क्षमतामा सहयोग, निजी क्षेत्रलाई दक्ष जनशक्ति उत्पादनमा सहजीकरण तथा युवालाई प्राविधिक सीपमा दक्ष बनाउन परियोजनाले काम गरिरहेको बताए ।
‘सरकार, निजी क्षेत्र र युवाबीच समन्वय गर्दै सम्मानित रोजगारी सिर्जनाका लागि परियोजनाले सहकार्य गरिरहेको छ’, उनले भने । कार्यक्रममा कक्षा ९ र १० का विद्यार्थीले तयार गरेका उद्यमशीलता चुनौती परियोजनाको प्रदर्शनीसमेत गरिनेछ ।
आयोजकका अनुसार कार्यक्रममा विद्यार्थी, युवा, उद्योगी व्यवसायी, शिक्षालय, विद्यालय, अभिभावक तथा रोजगारदाताको सहभागिता रहनेछ । करिब एक हजार विद्यार्थी तथा युवाको सहभागिता सुनिश्चित गर्ने लक्ष्य राखिएको छ भने कम्तीमा पाँच सय युवाले वृत्ति परामर्श सेवा, प्राविधिक शिक्षा तथा रोजगारीसम्बन्धी जानकारी प्राप्त गर्ने अपेक्षा गरिएको छ ।
