२८ जेठ २०८३, बिहीबार
नेकपा एमाले, नेकपा, श्रम संस्कृति पार्टी र राप्रपाको विरोध र नारावाजीकाबीच सभामुख डोलप्रसाद अर्यालले प्रतिनिधिसभाको बैठक चलाएका छन् ।
संसद्मा प्रधानमन्त्रीसँग प्रश्नोत्तर राख्नुपर्ने मागसहित विपक्षी दलले विरोध गरेपछि बिहीबार प्रतिनिधिसभाको पहिलो बैठक स्थगित भएको थियो ।
दोस्रो बैठकमा विपक्षी दलको नारावाजीकाबीच सभामुखले कानून मन्त्रीलाई प्रतिनिधिसभा सदस्य निर्वाचन पहिलो संशोधन विधेयकमाथि विचार गरियोस् भन्ने प्रस्ताव पेस गर्न अनुमति दिए ।
विपक्षीको नारावाजीबीच सभामुखले छलफलका लागि सांसदको नाम मागे । तर, कसैले टिपाएनन् ।
त्यसपछि सभामुखले प्रस्तावलाई निर्णयार्थ पेस गरे । विचार गरियोस् भन्ने प्रस्ताव बहुमतले स्वीकृत भएको घोषणा गरे ।
विपक्षी सांसदले भने संसदीय मर्यादा कायम गरियोस् भन्दै संसद्को वेलमा नारावाजी गरेका थिए ।
